(សៀមរាប)៖ ស្នងការដ្ឋាននគរបាលខេត្តសៀមរាប កាលពីថ្ងៃទី០៧,០៧,២០២៦ បានប្រកាសដាក់វិន័យ ដោយសម្រេចផ្អាកការងារជាបណ្តោះអាសន្នចំពោះមន្ត្រីនគរបាលម្នាក់ ដែលបប្រើប្រាស់កាយវិការ និងពាក្យសម្តីមិនសមរម្យពេលបំពេញភារកិច្ច។
នេះបើយោងតាមការបញ្ជាក់ពីក្រុមការងារប្រតិកម្មរហ័សនៃស្នងការដ្ឋាននគរបាលខេត្តសៀមរាប។
អ្នកនាំពាក្យរបស់ស្នងការដ្ឋាននគរបាលខេត្តសៀមរាប បានលើកឡើងថា បន្ទាប់ពីបានឃើញហ្វេសប៊ុកផេក(ប៉ុស្តិ៍ខ្សឹបដំណឹង)បានផ្សព្វផ្សាយវីដេអូ.ដោយសរសេរខ្លឹមសារថា(ហេតុអ្វី បើកឡានដឹកទំនិញលើផ្លូវក្រវ៉ាត់ក្រុងសៀមរាប ត្រូវជួបរឿងបែបនេះ!)។
ចំពោះវីដេអូខាងលើ អ្នកនាំពាក្យអះអាងថា គឺជាការចូលរួមតាមការស្នើសុំអន្តរាគម៍ម្ដងម្កាល របស់ក្រុមហ៊ុន ដែលទទួលសិទ្វិនិយោគសាងសង់ចំណតរថយន្ត និងធ្វើអាជីវកម្មភាស៊ីចំណតរថយន្ត នៅប៉ែកខាងកើត និងខាងលិចក្រុងសៀមរាប តាមឃាត់រថយន្តដឹកទំនិញពាក់ស្លាកលេខ ភ្នំពេញ 3E-7871 ដែលគេចវេះមិនបង់ភាស៊ី ចំនួន០២លើក នៅវេលាម៉ោង១១ថ្ងៃ០៦,០៧,២០២៦លើផ្លូវក្រវ៉ាត់ក្រុងសៀមរាប ។
ដោយឡែកចំពោះការប្រើប្រាស់កាយវិការ ពាក្យសម្ដី មិនសមរម្យ ខុសវិជ្ជាជីវៈ របស់មន្ត្រីនគរបាល ក្នុងវីដេអូ ស្នងការដ្ឋាននគរបាលខេត្តសៀមរាប បានត្រួតពិនិត្យកំហុសឆ្គង និងអនុវត្តតាមបទវិន័យនគរបាលជាតិ៕
