កាលពីថ្ងៃអាទិត្យ ១៦ សីហា យោធាអ៊ីរ៉ង់បានប្រកាសថាខ្លួនកំពុងផ្តល់រង្វាន់ចំនួន៣ម៉ឺនដុល្លារសម្រាប់ការសម្លាប់ ឬចាប់ខ្លួនទាហានអាមេរិក ដោយរង្វាន់នឹងកើនឡើងទ្វេដងប្រសិនបើធ្វើឡើងដោយស្ត្រី។
មេបញ្ជាការកងទ័ពលោក Amir Hatami បាននិយាយថាផែនការនេះត្រូវបានរៀបចំឡើងបន្ទាប់ពីមាន សំណើមួយចំនួនធំដើម្បីចូលរួម នេះបើយោងតាមទីភ្នាក់ងារសារព័ត៌មានរដ្ឋ IRNA។
លោក Hatami មិនបានផ្តល់ព័ត៌មានលម្អិតអំពីទីកន្លែង ឬពេលវេលាដែលការសម្លាប់ ឬចាប់ខ្លួនទាហានអាមេរិកត្រូវគេរំពឹងថានឹងកើតឡើងនោះទេ។
លោក Hatami បាននិយាយថា អ្នកណាដែលសម្លាប់ ឬចាប់ខ្លួន និងប្រគល់បុគ្គលិកយោធាអាមេរិក នឹងទទួលបានរង្វាន់ស្មើនឹង ៣០.០០០ ដុល្លារអាមេរិក ឬ ៥ ពាន់លានតូម៉ាន់ (tomans) ពីកងទ័ពសាធារណរដ្ឋអ៊ីស្លាមអ៊ីរ៉ង់ ។
លោកបានបន្ថែមថា ស្ត្រីអ៊ីរ៉ង់ដ៏ក្លាហានដែលអនុវត្តសកម្មភាពបែបនេះនឹងទទួលបានរង្វាន់ទ្វេដង។
លោក Hatami បាននិយាយម្តងទៀតអំពីការអំពាវនាវរបស់អ៊ីរ៉ង់ឱ្យសហរដ្ឋអាមេរិកចាកចេញពីមជ្ឈិមបូព៌ា ហើយបាននិយាយថា ពួកគេលែងមានការអនុញ្ញាតឱ្យចូលទៅក្នុងឈូងសមុទ្រពែក្ស ឈូងសមុទ្រអូម៉ង់ ឬច្រកសមុទ្រហ័រមូសទៀតហើយ៕
