(ភ្នំពេញ)៖ នៅថ្ងៃទី១៩ ខែសីហា ឆ្នាំ២០២៦ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអញ្ជើញ សំណេះសំណាលជាមួយអាចារ្យ អាចារិនីទូទាំងប្រទេសលើកទី១១ ចំនួនជាង១ពាន់នាក់ ពិធីសំណេះសំណាលនេះ ធ្វើឡើងនៅវិទ្យាស្ថានជាតិអប់រំ។
ក្នុងពិធីសំណេះសំណាលនេះ កើតចេញពីមនុញ្ញផល នៃសុខសន្តិភាព ស្ថិរភាពនយោបាយ និងការអភិវឌ្ឍលើគ្រប់ វិស័យរបស់សង្គមជាតិ ក្រោមការដឹកនាំប្រកបដោយចក្ខុវិស័យ វែង ឆ្ងាយ និងភាពប្រាកដនិយម របស់សម្តេចធិបតី នាយករដ្ឋមន្ត្រី និងការរួមចំណែកគាំទ្រពីភាគី ពាក់ព័ន្ធនានា បានធ្វើឱ្យសាសនា ប្រពៃណី ទំនៀមទម្លាប់របស់ខ្មែរយើង រក្សាបានយ៉ាងខ្ជាប់ខ្ជួននូវ អត្តសញ្ញាណរបស់ខ្លួន រហូតមកទល់បច្ចុប្បន្ននេះ។ សាសនាវប្បធម៌ ប្រពៃណីទំនៀមទម្លាប់ បានដើរតួនាទីយ៉ាងសំខាន់ក្នុងការជួយពង្រឹង និងអប់រំសីលធម៌ ចរិយាធម៌សង្គម ដែលជាការរួមចំណែកក្នុងការអនុវត្តគោលនយោបាយបញ្ចកោណ ដំណាក់កាលទី១របស់រាជរដ្ឋាភិបាលនីតិកាលទី៧ នៃរដ្ឋសភាធ្វើឱ្យសង្គមកម្ពុជាទាំងមូលមានសុខសន្តិភាពស្ថិរភាពប្រជាជនរស់នៅប្រកបដោយ ភាពថ្លៃថ្នូរ មានសុខដុមរមនាជាមួយគ្នា ចាកផុតពីការរើសអើងការប្រកាន់ពូជសាសន៍ ពណ៌សម្បុរនិន្នាការជំនឿសាសនា អំពើប្រទូស្តរ៉ាយ អំពើហិង្សាផ្សេងៗទាំង នៅក្នុងគ្រួសារ សហគមន៍ក៏ដូចជានៅក្នុងសង្គមជាតិផងដែរ។
ក្រៅពីដំណើរការកម្មវិធី «នាទីព្រះពុទ្ធសាសនាផ្សារភ្ជាប់នឹងសង្គម» ដែលជាកម្មវិធីផ្តល់ការអប់រំតាមរយៈព្រះធម៌ទេសនា ការស្រាវជ្រាវចងក្រងប្រវត្តិវត្តអារាមនៅទូទាំងប្រទេសក្បួន តម្រាផ្សេងៗការបោះពុម្ពសៀវភៅនានាសម្រាប់បង្រៀននៅក្នុងវិស័យពុទ្ធិកសិក្សាកម្មវិធីទស្សនទានព្រះពុទ្ធ សាសនា ការផលិតវីដេអូខ្លីដើម្បីការអប់រំសីលធម៌ ចរិយាធម៌ ការបង្ហាញពីវិធីប្រតិបត្តិតាម ទំនៀមខ្មែរនៅតាមប្រព័ន្ធផ្សព្វផ្សាយ និងនៅតាមទីសាធារណៈហើយនោះការបើកវគ្គបណ្តុះបណ្តាលតួនាទីភារកិច្ចនិងក្រមសីលធម៌អាចារ្យ អាចារិនីខ្មែរ នាពេលកន្លងមកក៏ចាត់ទុកជាកម្មវិធីអាទិភាពមួយដែលទទួលបាននូវលទ្ធផលដ៏ត្រចះត្រចង់របស់ក្រសួងធម្មការនិងសាសនា។លទ្ធផលទាំងនេះកើតចេញពីស្មារតីនៃការអនុវត្តតាមអនុសាសន៍ណែនាំដ៏ខ្ពង់ខ្ពស់របស់ សម្តេច តេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រីនៃ កម្ពុជា កាលពីថ្ងៃទី០៩ ខែតុលា ឆ្នាំ២០០៩ ស្ដីពីវិបត្តិអាចារ្យ។
កត្តានេះហេីយ បានជំរុញឱ្យក្រសួងធម្មការនិងសាសនា យកចិត្តទុកដាក់ខ្ពស់ ប្រកបដោយស្មារតីបុរេសកម្មខិតខំស្រាវជ្រាវឯកសារ និងស្វែងរកធនធានចាស់ព្រឹទ្ធាចារ្យ និងអាចារ្យដែលមានចំណេះដឹងចងចាំបានច្បាស់លាស់នូវពិធីកម្មនានា មានសមត្ថភាពជំនាញខ្ពស់និងបទពិសោធន៍ជ្រៅ ជ្រះដើម្បីចូលរួមបើកវគ្គបណ្តុះបណ្តាលតួនាទីភារកិច្ចនិងក្រមសីលធម៌អាចារ្យខ្មែរក្នុងគោលដៅតម្រង់ទិសទៅលើ ការដឹកនាំរៀបចំសាសនពិធីនិងទម្រង់ជើងការនៃពិធីអាពាហ៍ពិពាហ៍ឱ្យមានលក្ខណៈត្រឹមត្រូវជួយបំពេញបន្ថែមដល់ អាចារ្យ អាចារិនី នៅតាមមូលដ្ឋានឱ្យកាន់តែមាន ចំណេះដឹងទូលំទូលាយបង្កលក្ខណៈងាយស្រួលក្នុងការយកទៅអនុវត្ដឱ្យស្របទៅនឹងក្បួនច្បាប់ដែលបានកំណត់ទុកពីបុរាណរៀងមកនិងឱ្យមានការយល់ស្របជាទម្រង់នៃការប្រតិបត្តិ ពីតំបន់មួយទៅតំបន់មួយនៅទូទាំងប្រទេសកម្ពុជា។
បច្ចុប្បន្ននេះ ក្រសួងបានបើកវគ្គបណ្តុះបណ្តាលតួនាទី ភារកិច្ចនិងក្រមសីលធម៌ អាចារ្យខ្មែរ បានចំនួន៥៣វគ្គរួចមកហើយមានសិក្ខាកាមជាអាចារ្យ អាចារិនី ព្រះសង្ឃបានចូល មកសិក្សាចំនួនសរុប១៤,២៩៨អង្គ/នាក់ ក្នុងនោះព្រះសង្ឃ១,១២៤ព្រះអង្គ អាចារិនី ២៣២នាក់។
ក្រោយបើកវគ្គបណ្តុះបណ្តាលតួនាទីភារកិច្ចនិងក្រមសីលធម៌អាចារ្យខ្មែរ ជាលទ្ធផលបានសង្កេតឃើញថាសិក្ខាកាម ទាំងអស់ទទួលបាននូវអត្ថប្រយោជន៍ជាច្រើនដូចជា៖ ១៖ ទទួលបានចំណេះដឹងនិងបទពិសោធន៍ជាច្រើនពីសំណាក់ គ្រូឧទ្ទេសាចារ្យ។ ២៖ ទទួលបាននូវឯកសារ ក្បួនច្បាប់ច្បាស់លាស់ និងត្រឹមត្រូវសម្រាប់យកទៅប្រតិបត្តិនិងផ្សព្វផ្សាយបន្ត។ ៣៖ ទទួលបាននូវបទពិសោធន៍រវាងសិក្ខាកាមនិងសិក្ខាកាម ការស្គាល់គ្នាពីតំបន់មួយទៅតំបន់មួយ និង ការផ្លាស់ប្តូរមតិយោបល់គ្នា។ ៤៖បានដោះស្រាយនូវចម្ងល់រួម ក្នុងការប្រារព្ធពិធីកម្ម និងពិធី មង្គលនានា ដែលមាន លក្ខណៈ ផ្សេងៗគ្នា តាមទម្លាប់ក្នុង តំបន់ឱ្យមានការយល់ស្របគ្នាជាទស្សនៈក្នុងការប្រតិបត្តិ។ ៥៖ យល់ដឹងនិងប្រតិបត្តិបានត្រឹមត្រូវតាមតួនាទី ភារកិច្ច និងក្រមសីលធម៌របស់អាចារ្យខ្មែរ។ ៦៖ អាចរួបរួមគ្នាបង្កើតបាននូវសាមគ្គីធម៌ រួមចំណែកធ្វើឱ្យមាន សុខដុមនីយកម្មសាសនា និងប្រពៃណី ទំនៀមទម្លាប់។ ៧៖ ជាកម្លាំងចលករដ៏សំខាន់ ក្នុងការបន្តថែរក្សា ការពារ ប្រពៃណី ទំនៀមទម្លាប់ដ៏ល្អផូរផង់របស់ខ្មែរ ឱ្យ ស្ថិតស្ថេរ គង់វង្សអស់កាលជាយូរអង្វែង។
ក្រោយពីមានការបើកវគ្គបណ្តុះបណ្តាលស្តីពីតួនាទីភារកិច្ច និងក្រមសីលធម៌អាចារ្យខ្មែរ និងតាមរយៈការផ្សព្វផ្សាយយ៉ាងទូលំទូលាយនូវកម្រងឯកសារនានាទាក់ទងនឹងប្រពៃណីទំនៀមទម្លាប់រួចមកសង្កេតឃើញថារាល់ការប្រារព្ធពិធីកម្មពិធីបុណ្យសាសនានិងពិធីមង្គលផ្សេងៗពិតជាមានការចូលរួមកែលម្អបានយ៉ាងច្រើនពីសំណាក់ អាចារ្យ អាចារិនី និងប្រជាជនខ្មែរទូទាំងប្រទេសផងដែរ៕
