ស្ត្រីប៉ាឡេស្ទីន២នាក់បានរងរបួសដោយសារបំណែកគ្រាប់កាំភ្លើងពិត ក្នុងអំឡុងពេលកងកម្លាំងអ៊ីស្រាអែលចូលវាយឆ្មក់ផ្ទះមួយនៅទីក្រុង Qusra ភាគខាងត្បូងទីក្រុង Nablus ក្នុងតំបន់West Bank កាលពីថ្ងៃពុធ។
ប្រភពពីសារព័ត៌មានAnadolu Agencyនៅថ្ងៃទី២០ខែសីហា។
តាមក្រុមអឌ្ឍចន្ទក្រហមប៉ាឡេស្ទីន អ្នករងរបួសទាំងពីរនាក់ត្រូវបានព្យាបាលនៅកន្លែងកើតហេតុ មុនបញ្ជូនទៅមន្ទីរពេទ្យ។
នៅទីក្រុង Qusra ផ្ទះរបស់គ្រួសារប៉ាឡេស្ទីន ៣ក៏ត្រូវបានឡោមព័ទ្ធអស់រយៈពេល ១១ថ្ងៃជាប់គ្នា។ អាជ្ញាធរមូលដ្ឋានបាននិយាយថា កងកម្លាំងអ៊ីស្រាអែលបានប្រកាសតំបន់នោះជាតំបន់យោធា ហើយបានកាន់កាប់ផ្ទះមួយខ្នង ដើម្បីប្រើប្រាស់ជាទីតាំងយោធា។
ក្រៅពីនេះ កងកម្លាំងអ៊ីស្រាអែលបានបើកប្រតិបត្តិការវាយឆ្មក់នៅទីក្រុង និងភូមិជាច្រើនទៀតនៅ West Bank ដោយមានការចាប់ខ្លួនជនជាតិប៉ាឡេស្ទីន និងការឆែកឆេរផ្ទះ។ ស្របពេលជាមួយគ្នា ក៏មានការរាយការណ៍អំពីការវាយប្រហាររបស់អ្នកតាំងទីលំនៅអ៊ីស្រាអែលលើប្រជាជនប៉ាឡេស្ទីន និងទ្រព្យសម្បត្តិរបស់ពួកគេ។
ហេតុការណ៍ទាំងនេះកើតឡើងក្នុងបរិបទដែលអំពើហិង្សា និងប្រតិបត្តិការយោធានៅ West Bank កំពុងកើនឡើង ខណៈសកម្មភាពសាងសង់តំបន់តាំងទីលំនៅ និងការរឹតត្បិតចលនារបស់ប្រជាជនប៉ាឡេស្ទីនក៏កាន់តែខ្លាំង។ អង្គការសហប្រជាជាតិបានព្រមានកាលពីថ្ងៃទី១២ ខែសីហា ថា អំពើហិង្សាលើប្រជាជនប៉ាឡេស្ទីននៅ West Bank បានឈានដល់កម្រិតមិនធ្លាប់មានពីមុន៕
