អ៊ីរ៉ង់បានព្រមានប្រទេសជិតខាងថា ប្រសិនបើប្រទេសទាំងនោះ ជួយសហរដ្ឋអាមេរិក ក្នុងការដាក់សម្ពាធសេដ្ឋកិច្ចលើអ៊ីរ៉ង់។
នោះអ៊ីរ៉ង់ នឹងចាត់ទុកពួកគេ ជាសត្រូវ និងវាយប្រហារផលប្រយោជន៍របស់ពួកគេ។
ប្រភពពីសារព័ត៌មាន Anadolu Agency នៅថ្ងៃទី២៣ ខែសីហា។
មន្ត្រីជាន់ខ្ពស់អ៊ីរ៉ង់ លោក Mohsen Rezaee បាននិយាយថា ប្រសិនបើប្រទេសជិតខាងសហការជាមួយអាមេរិក អ៊ីរ៉ង់អាចរារាំងការដឹកជញ្ជូនប្រេងចេញពីឈូងសមុទ្រពែរ្ស និងច្រកសមុទ្រ Hormuz ដែលជាផ្លូវសំខាន់សម្រាប់ការដឹកជញ្ជូនប្រេង និងឧស្ម័នទៅកាន់ទីផ្សារពិភពលោក។
អ៊ីរ៉ង់ក៏បានអះអាងថា ច្រកសមុទ្រ Hormuz នៅតែបិទ ហើយនឹងមិនបើកឡើងវិញទេ រហូតដល់អាមេរិកផ្លាស់ប្តូរគោលជំហររបស់ខ្លួន។
ការព្រមាននេះកើតឡើងនៅពេលទំនាក់ទំនងរវាងអ៊ីរ៉ង់ និងអាមេរិកកំពុងតានតឹងខ្លាំង។ ប្រធានាធិបតីអាមេរិក Donald Trump បានប្រកាសបង្កើនសម្ពាធសេដ្ឋកិច្ចលើអ៊ីរ៉ង់ ខណៈការចរចារវាងប្រទេសទាំងពីរដែលធ្លាប់មានកាលពីខែមិថុនា ក៏បានជាប់គាំង៕
