(កំពង់ស្ពឺ)៖ កាលពីថ្ងៃទី២៣ ខែសីហា ឆ្នាំ២០២៦ មន្ត្រីឧទ្យានុរក្ស នៃការិយាល័យឧទ្យានជាតិគិរីរម្យ បានចុះប្រតិបត្តិការបង្ក្រាបការបោះបង្គោលហ៊ុមព័ទ្ធលើដីដែលជាទ្រព្យសម្បត្តិរដ្ឋ ក្នុងឧទ្យានជាតិព្រះសុរាម្រិតកុសុមៈគិរីរម្យ។
ការចុះបង្ក្រាបនេះ មានគោលបំណងទប់ស្កាត់ការប៉ុនប៉ងយកដីរដ្ឋធ្វើជាកម្មសិទ្ធិផ្ទាល់ខ្លួនខុសច្បាប់ នៅចំណុចភ្នំហាមឃាត់ ស្ថិតក្នុងឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។
ស្របពេលចុះពិនិត្យដល់ទីតាំងផ្ទាល់ មន្ត្រីឧទ្យានុរក្សបានប្រទះឃើញមានការលួចដាំបង្គោលរបងឈើចំនួន ៦៥បង្គោល លើផ្ទៃដីប្រមាណ(០.៤០ហិកតា)។ ដើម្បីអនុវត្តវិធានការច្បាប់ មន្ត្រីឧទ្យានុរក្សបានដកកម្ទេចបង្គោលទាំងនោះចោលនៅនឹងកន្លែងតែម្តង និងកំពុងបន្តស្រាវជ្រាវរកអញ្ញាតជនដែលបានប្រព្រឹត្ត ដើម្បីចាត់ការតាមនីតិវិធីស្របតាមក្រមបរិស្ថាន និងធនធានធម្មជាតិ។
សូមលេីកឡេីងថា លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានដាក់ចេញនូវយុទ្ធនាការធ្វើសុក្រឹតកម្មការអនុវត្តច្បាប់នៅឧទ្យានជាតិគិរីរម្យ ដែលមានបីជំហានសំខាន់ៗ រួមមាន៖
ទី១. ការទប់ស្កាត់និងការការពារ
ទី២. ការរៀបចំសណ្តាប់ធ្នាប់
ទី៣. ការអភិវឌ្ឍប្រកបដោយចីរភាព។
សកម្មភាពនេះបានបង្ហាញពី ការប្តេជ្ញាចិត្តយ៉ាងមុតមាំរបស់ក្រសួងបរិស្ថាន ក្នុងការការពារ អភិរក្សធនធានធម្មជាតិរបស់ជាតិឱ្យបានគង់វង្សសម្រាប់មនុស្សជំនាន់ក្រោយ៕
