រដ្ឋមន្ត្រីការបរទេសកូរ៉េខាងត្បូង លោក Cho Hyun និងរដ្ឋមន្ត្រីការបរទេសអាមេរិក លោក Marco Rubio បានពិភាក្សាគ្នាតាមទូរស័ព្ទកាលពីថ្ងៃទី២៤ ខែសីហា ដោយបានព្រមព្រៀងរក្សាការទំនាក់ទំនងជិតស្និទ្ធ និងបន្តសហប្រតិបត្តិការលើបញ្ហានុយក្លេអ៊ែរកូរ៉េខាងជើង។
ប្រភពពីសារព័ត៌មានCNA។
ការពិភាក្សានេះកើតឡើង ខណៈទំនាក់ទំនងរវាងសម្ព័ន្ធមិត្តទាំងពីរកំពុងប្រឈមនឹងភាពតានតឹងមួយចំនួន បន្ទាប់ពីប្រធានាធិបតីអាមេរិក Donald Trump បានបង្ហាញជំហរបើកចំហចំពោះមេដឹកនាំកូរ៉េខាងជើង Kim Jong Un និងបានប្រកាសកាត់បន្ថយការធ្វើសមយុទ្ធយោធារួមគ្នារវាងអាមេរិក និងកូរ៉េខាងត្បូង។
ក្នុងការសន្ទនា លោក Rubio និងលោក Cho បានពិភាក្សាអំពីបញ្ហាជាច្រើនពាក់ព័ន្ធនឹងសម្ព័ន្ធភាពអាមេរិក-កូរ៉េខាងត្បូង។ ក្រសួងការបរទេសអាមេរិកបានបញ្ជាក់ថា ប្រទេសទាំងពីរត្រូវរក្សាការសម្របសម្រួលយ៉ាងជិតស្និទ្ធលើបញ្ហាសំខាន់ៗសម្រាប់សម្ព័ន្ធភាព។
សម្រាប់កូរ៉េខាងត្បូង ការរក្សាកិច្ចសហប្រតិបត្តិការជាមួយអាមេរិកមានសារៈសំខាន់ជាពិសេសក្នុងការដោះស្រាយបញ្ហាកម្មវិធីនុយក្លេអ៊ែរ និងសន្តិសុខនៅឧបទ្វីបកូរ៉េ ខណៈភាពមិនប្រាកដប្រជាពីគោលនយោបាយរបស់រដ្ឋបាល Trump កំពុងធ្វើឱ្យអ្នកវិភាគព្រួយបារម្ភអំពីស្ថិរភាពនៃសម្ព័ន្ធភាព និងសន្តិសុខក្នុងតំបន់អាស៊ី៕
