មន្ត្រីម្នាក់បានប្រាប់ Anadolu កាលពីថ្ងៃពុធទី២៦.០៨.២០២៦ថា ចំនួនអ្នកស្លាប់ដោយសាររញ្ជួយដី កាលពីសប្តាហ៍មុន នៅប្រទេសឥណ្ឌូនេស៊ី បានកើនឡើងដល់១០៥នាក់ ខណៈដែលមនុស្សជិត១៨០,០០០ នាក់ត្រូវបានផ្លាស់ទីលំនៅនៅក្នុងខេត្ត East Nusa Tenggara។
លោក Berton Panjaitan ប្រធានមជ្ឈមណ្ឌលទំនាក់ទំនង នៅទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូនេស៊ី បាននិយាយនៅក្នុងសេចក្តីថ្លែងការណ៍ជាលាយលក្ខណ៍អក្សរមួយថា“ចំនួនអ្នកផ្លាស់ទីលំនៅបានកើនឡើងដល់១៧៩,០៣៧ នាក់ បន្ទាប់ពីការរញ្ជួយដីដ៏ខ្លាំងមួយកម្រិត ៧.៧ រ៉ិចទ័របានវាយប្រហារប្រទេសនេះនៅថ្ងៃទី ១៥ ខែសីហា”។
យោងតាមលោក Panjaitan សរុបចំនួន ៧,៧៨៧ រញ្ជួយដីត្រូវបានកត់ត្រានៅទូទាំងតំបន់ចាប់តាំងពីការរញ្ជួយដីដំបូង។
ចំនួនអ្នកស្លាប់ដោយសារគ្រោះមហន្តរាយ ក៏បានកើនឡើងផងដែរ ដោយចំនួនអ្នកស្លាប់កើនឡើងដល់ ១០៥ នាក់ និងចំនួនអ្នករងរបួសកើនឡើងដល់១,៦៧៨នាក់ លោកបាននិយាយ។
ប្រតិបត្តិការសង្គ្រោះ និងការចែកចាយជំនួយនៅតែបន្តដំណើរការនៅក្នុងតំបន់ដែលរងគ្រោះខ្លាំងបំផុត។
គ្រោះរញ្ជួយដីនេះបានបង្កការបំផ្លិចបំផ្លាញយ៉ាងទូលំទូលាយនៅទូទាំងខេត្ត East Nusa Tenggara ដែលជាទីតាំងនៃមជ្ឈមណ្ឌលទេសចរណ៍ដ៏លេចធ្លោ Labuan Bajo ដោយបានបន្សល់ទុកផ្ទះ និងអគារចំនួន ៣៦.១៦៣ ខ្នងរងការខូចខាត៕
