កាលពីថ្ងៃទី២៨ ខែសីហា ឆ្នាំ២០២៦ អាជ្ញាធរគ្រប់គ្រងគ្រោះមហន្តរាយនេប៉ាល់កំពុងតាមដានបឹងទឹកពីរដែលស្ថិតនៅខាងលើតំបន់រងគ្រោះដោយទឹកជំនន់ ខណៈហានិភ័យទឹកជំនន់នឹងនៅតែមានរហូតដល់បឹងទាំងពីរត្រូវបានបង្ហូរទឹកអស់។
ប្រភពពីសារព័ត៌មានReuter។
មន្ត្រីបានបញ្ជាក់ថា បឹងមួយក្នុងចំណោមបឹងទាំងពីរ បានចាប់ផ្តើមហូរហៀរចេញកាលពីថ្ងៃសុក្រ បន្ទាប់ពីការបាក់រលំផ្ទាំងទឹកកកនៅតំបន់ព្រំដែននេប៉ាល់-ទីបេ បានបណ្តាលឱ្យថ្ម ទឹកកក ភក់ និងកម្ទេចកម្ទីហូរចូលប្រព័ន្ធទន្លេ បង្កជារលកទឹកជំនន់ដ៏ខ្លាំងកាលពីថ្ងៃពុធ។
រូបភាពផ្កាយរណបបានបង្ហាញថា បឹងមួយកំពុងបង្ហូរទឹក ខណៈបឹងមួយទៀតនៅខាងលើហាក់ដូចជាកំពុងរីកធំឡើង ហើយមិនទាន់ឃើញមានផ្លូវបង្ហូរទឹកចេញ។ ស្ថានភាពនេះបង្កការព្រួយបារម្ភថា សម្ពាធទឹកអាចនៅតែកើនឡើង និងបង្កហានិភ័យដល់តំបន់ខាងក្រោម។
អាជ្ញាធរនេប៉ាល់កំពុងប្រើរូបភាពផ្កាយរណបដើម្បីតាមដានបឹងទាំងពីរ ប៉ុន្តែការតាមដាននៅមានកម្រិត ដោយសារភាពមានកំណត់នៃរូបភាពផ្កាយរណប។ រដ្ឋាភិបាលក៏មានផែនការដំឡើងកាមេរ៉ា និងឧបករណ៍ចាប់សញ្ញានៅតំបន់ខាងក្រោម រួមទាំងក្បែរទីក្រុងព្រំដែន Timure ដើម្បីព្រមានឱ្យបានឆាប់រហ័ស ប្រសិនបើស្ថានភាពទឹកប្រែប្រួល។
អាជ្ញាធរបានព្រមានថា ហានិភ័យទឹកជំនន់នឹងមិនទាន់បញ្ចប់ទេ រហូតដល់បឹងទាំងពីរត្រូវបានបង្ហូរទឹកចេញទាំងស្រុង៕
