(ភ្នំពេញ)៖ ប្រជាពលរដ្ឋកំពុងស្រែកដង្ហោយរកយុត្តិធម៌ និងសុំកិច្ចអន្តរាគមន៍ពីថ្នាក់ដឹកនាំ ដោយថែមទាំងរៀបចំឯកសារ ដើម្បីប្ដឹងអភិបាលខណ្ឌចំការមន ទៅក្រសួងមហាផ្ទៃនិងតុលាការទៀតផង.ពាក់ព័ន្ធករណីឈូសឆាយផ្ទះគាត់ចោល ដោយមិនបានជូនដំណឹងជាមុន និងគ្មានការសម្រេចពីស្ថាប័នតុលាការ.!!។
*ករណីនេះលោកអភិបាលខណ្ឌ ថ្លែងថា មកពីពលរដ្ឋអាស្រ័យផលលើដីអនុក្រឹត្យ និងជួសជុលផ្ទះបន្ថែម.!!។
សូមជម្រាបថា ការឈូសឆាយនិងរុះរើផ្ទះនេះបានធ្វើឡើង នៅថ្ងៃទី០២ ខែកញ្ញា ឆ្នាំ២០២៦ ត្រង់ចំណុចផ្លូវលេខ១០៥ ភូមិ៤ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ដែលមានលោកយាយ យី គួយ អាយុ៩៤ឆ្នាំរួមនិងកូនៗជាម្ចាស់ផ្ទះ!។
*ទាក់ទិនរឿងនេះលោកយាយ យី គួយ រួមនិងកូនៗ
ពោលគឺ រូបគាត់រស់នៅលើដីឡូ.ទំហំក្បាល១០ម៉ែត្រ.ជម្រៅ៣០ម៉ែត្រ ដោយសង់ផ្ទះស្នាក់នៅតាំងពីមុនរហូតដល់បច្ចុប្បន្ន។
ប៉ុន្តែដោយសារផ្ទះរបស់គាត់ចាស់ពេក និងលេចទឹកតាមដំបូលពិបាករស់នៅ ទើបចាំបាច់ក្នុងការជួសជុលឡើងវិញ.!។
ផ្ទុយទៅវិញស្ងាត់ៗស្រាប់តែលេចមុខលោក ជិន វិចិត្រ អភិបាលរងខណ្ឌ លោក អុីវ ថាវី នាយករងរដ្ឋបាលខណ្ឌ ក្រោមបទបញ្ជាពីលោក កៀង ល័ក្ស អភិបាលខណ្ឌចំការមន បាននាំគ្រឿងចក្រមកឈូសឆាយរបងរួមនិងផ្ទះ របស់គាត់ចោលទាំងស្រុងតែម្ដង.!។
ប្រភពដដែលបន្តថា ការឈូសឆាយនិងរុះរើផ្ទះរបស់ខ្លួនចោល ពីសំណាក់អាជ្ញាធរនៅពេលនេះ គឺពុំបានជូនដំណឹងជាមុន និងគ្មានដីកាពីតុលាការនោះទេ!។
ក្នុងនោះប្រសិនបើអាជ្ញាធរ រុះរើត្រឹមតែចំណុចដែលខ្លួនជួសជុលថ្មីនោះ.មិនធ្ងន់ធ្ងរប៉ុន្មានទេ!។
តែនេះអាជ្ញាធរ មករុះរើនិងឈូសឆាយកម្ទេចចោលទាំងផ្ទះចាស់ ដែលមានស្រាប់ទៀតផង បណ្ដាលឱ្យពួកគាត់រងការខាតបង់យ៉ាងធ្ងន់ធ្ងរ ត្រូវដេកឈឺចាប់រីងរៃ លែងមានដំបូលជ្រកដូចមុនៗ..!។
ក្រុមគ្រួសារលោកយាយ យី គួយ អះអាងថាសកម្មភាពខាងលើបានបង្កការឈឺចាប់ជាខ្លាំង ដោយពេលនេះគ្រួសារខ្លួនកំពុងរៀបចំឯកសារ ដើម្បីប្តឹងលោក កៀង ល័ក្ស និងអ្នកពាក់ព័ន្ធចូលក្រសួងមហាផ្ទៃនិងតុលាការ ពីបទធ្វើអោយខូចខាតដោយចេតនា រំលោភអំណាច ចាត់វិធានការសំដៅរារាំងការអនុវត្តច្បាប់ និងស្ថានទម្ងន់ទោស ប៉ះពាល់កម្មសិទ្ធិរបស់ខ្លួន។
ដើម្បីឱ្យមានចម្លើយទាំងសងខាងនៅរសៀលថ្ងៃទី០២.០៩.២០២៦”ដើមរាំង”បានសុំការបំភ្លឺពីលោក ហែម សុផាត ចៅសង្កាត់ផ្សារដើមថ្កូវ
ដោយលោកថ្លែងថា ការឈូសឆាយនោះគឺជាកម្លាំងរបស់រដ្ឋបាលខណ្ឌ.។
លោកចៅសង្កាត់ បន្តថា ដីនៅតំបន់នោះ គឺស្ថិតក្នុងអនុក្រឹត្យក្រោមការគ្រប់គ្រងនិងចាត់ចែងរបស់អន្តរក្រសួង ដែលត្រូវហាមឃាត់ ចំពោះការសាងសង់បន្ថែម។
ក្នុងនោះលោក ហែម សុផាត ក៏បានទទួលស្គាល់ដែរថា ការឈូសឆាយខាងលើ គឺពុំមានដីកាពីតុលាការប្រាកដមែន.!។
*រីឯលោក កៀង ល័ក្ស អភិបាលខណ្ឌចំការមន
បានថ្លែងថា អាជ្ញាធរពុំបានឈូសឆាយផ្ទះគាត់ចោលទាំងស្រុងនោះទេ ពោលគឺ អាជ្ញាធរគ្រាន់តែចុះរុះរើ.របងនិងផ្ទះដែលគាត់សង់បន្ថែមប៉ុណ្ណោះ.ព្រោះដីនោះស្ថិតក្នុងអនុក្រឹត្យ។
លោកបន្តថា ពលរដ្ឋដទៃទៀតដែលពុំបានសង់ផ្ទះបន្ថែមគឺអាជ្ញាធរមិនរុះរើឡើយ។
-ចំពោះសំណួរថា តើបានជូនដំណឹងដល់ម្ចាស់ផ្ទះទេ.មុនចុះឈូសឆាយ.?។
-ត្រង់ចំណុចនេះលោក កៀង ល័ក្ស បានឆ្លើយថា មកពីរកម្ចាស់ផ្ទះមិនឃើញ។
បើតាមលោកអភិបាលខណ្ឌ ដីនៅតំបន់នោះពលរដ្ឋសុទ្ធតែមានបង្កាន់ដៃដើម្បីត្រៀមទទួលផលប៉ះពាល់ ជាថ្នូរនឹងការរុះរើចេញ គ្រាន់តែពុំទាន់ដល់ពេលប៉ុណ្ណោះ។
*ទោះជាយ៉ាងណាក៏ដោយ ក្រុមគ្រួសារពលរដ្ឋខាងលើ សុំស្នើយ៉ាងទទូចដល់ឯកឧត្ដម ឃួង ស្រេង អភិបាលរាជធានីភ្នំពេញ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មេត្តាជួយរកយុត្តិធម៌ ឱ្យពួកខ្លួនដោយក្ដីអនុគ្រោះ នឹងសុំចាត់វិធានការលើលោកអភិបាលខណ្ឌចំការមន រួមនិងអ្នកពាក់ព័ន្ធ កុំអោយមានការយោគយល់អោយសោះ ដោយពួកគាត់អះអាងថា មន្ត្រីទាំងនេះប្រើសិទ្ធិអំណាចហួសដែនកំណត់.ធ្វើការឈូសឆាយផ្ទះគាត់ចោល!ដោយពុំបានជូនដំណឹងជាមុន និងគ្មានដីកាពីតុលាការ៕
