ក្រុមអ្នកសង្គ្រោះ នៅប្រទេសនេប៉ាល់ កំពុងបន្តស្វែងរកអ្នកបាត់ខ្លួន និងអ្នកដែលអាចនៅរស់នៅក្រោមគំនរភក់ និងកម្ទេចកម្ទី បន្ទាប់ពីទឹកជំនន់ដ៏ខ្លាំងបានវាយប្រហារតំបន់ព្រំដែនចិន-នេប៉ាល់ កាលពីថ្ងៃទី២៦ ខែសីហា ឆ្នាំ២០២៦។
ប្រភពពីសារព័ត៌មានAFP នៅថ្ងៃទី៥ខែកញ្ញា។
រហូតមកដល់ថ្ងៃទី៥ ខែកញ្ញា នៅនេប៉ាល់មានមនុស្ស១,២៩៤ នាក់ស្លាប់ និងជាង ៥,០០០ នាក់បាត់ខ្លួន។
នៅចិនក៏មានអ្នកស្លាប់៣១នាក់ និងបាត់ខ្លួន ៥៣១នាក់។ សរុបមក មនុស្ស ១,៣២៥នាក់បានស្លាប់ និងជាង ៥,៥០០នាក់បាត់ខ្លួន នៅប្រទេសទាំងពីរ។
ក្តីសង្ឃឹមបានកើតឡើងវិញ បន្ទាប់ពីអ្នកសង្គ្រោះបានជួយ កម្មករវារីអគ្គិសនី ២ នាក់ឱ្យរួចជីវិត កាលពីថ្ងៃសុក្រ។ ពួកគេបានជាប់ក្នុងផ្លូវរូងក្រោមដីអស់៩ ថ្ងៃ មុនពេលត្រូវបានរកឃើញ និងជួយចេញបាន។
បច្ចុប្បន្ន ពួកគេកំពុងសម្រាកព្យាបាលនៅមន្ទីរពេទ្យ និងមានស្ថានភាពស្ថិរភាព។
ទឹកជំនន់បានបំផ្លាញគម្រោងវារីអគ្គិសនីយ៉ាងហោចណាស់ ១២កន្លែង ហើយក្រុមអ្នកសង្គ្រោះមកពីឥណ្ឌា ចិន អូស្ត្រាលី និងកូរ៉េខាងត្បូង កំពុងជួយស្វែងរកអ្នកបាត់ខ្លួន។
ដោយសារមានសាកសពច្រើនពេក អាជ្ញាធរបានបញ្ចុះសាកសពប្រមាណ ១,០៣០ នាក់ក្នុងផ្នូររួម បន្ទាប់ពីយកសំណាក DNA ដើម្បីកំណត់អត្តសញ្ញាណនៅពេលក្រោយ។
នាយករដ្ឋមន្ត្រីនេប៉ាល់ Balendra Shah បានសន្យាថា រដ្ឋាភិបាលនឹងជួយផ្តល់កន្លែងស្នាក់នៅដែលមានសុវត្ថិភាពដល់ប្រជាជនរាប់ពាន់នាក់ ដែលបានបាត់បង់ផ្ទះសម្បែង និងកំពុងរស់នៅក្នុងជំរំបណ្តោះអាសន្ន៕
