ក្រុមជួយសង្គ្រោះឥណ្ឌូណេស៊ីជាង៦០០នាក់កំពុងស្វែងរកមនុស្ស១២៩នាក់ដែលបាត់ខ្លួន បន្ទាប់ពីនាវាដឹកអ្នកដំណើរVirgo Transport 8 បានក្រឡាប់ក្នុងសមុទ្រជ្វា កាលពីថ្ងៃអាទិត្យទី១៣ ខែកញ្ញា ឆ្នាំ២០២៦។
ប្រភពពីសារព័ត៌មានCNA។
នាវានេះមានមនុស្សសរុប២៤៣នាក់ និងកំពុងធ្វើដំណើរពីទីក្រុង Surabaya ទៅទីក្រុង Banjarmasin ប៉ុន្តែបានជួបអាកាសធាតុអាក្រក់ និងរលកសមុទ្រខ្លាំង។ រហូតមកដល់ព្រឹកថ្ងៃទី១៤ ខែកញ្ញា អាជ្ញាធរបានជួយសង្គ្រោះមនុស្ស ១០៨នាក់ ខណៈ ៦នាក់បានស្លាប់ និង ១២៩នាក់ទៀតនៅបាត់ខ្លួន។
ក្រុមជួយសង្គ្រោះបានបញ្ជូនបុគ្គលិក ៦២២នាក់ និងនាវាប្រមាណ ១២គ្រឿង ចូលរួមក្នុងប្រតិបត្តិការស្វែងរក។ មូលហេតុពិតប្រាកដដែលធ្វើឱ្យនាវាក្រឡាប់នៅមិនទាន់ត្រូវបានបញ្ជាក់ ហើយអាជ្ញាធរកំពុងស៊ើបអង្កេត។
ឥណ្ឌូណេស៊ីពឹងផ្អែកខ្លាំងលើការធ្វើដំណើរតាមនាវា ព្រោះប្រទេសនេះមានកោះប្រមាណ ១៧,០០០កោះ ហើយការធ្វើដំណើរតាមសមុទ្រមានតម្លៃថោកជាងការធ្វើដំណើរតាមយន្តហោះ៕
