រុស្ស៊ីបានបន្តវាយប្រហារតាមអាកាសលើទីក្រុងកៀវ ប្រទេសអ៊ុយក្រែននៅថ្ងៃទី២៩ ខែកញ្ញា ឆ្នាំ២០២៦ បន្ទាប់ពីការវាយប្រហារដោយដ្រូនលើអគារបណ្ឌិត្យសភាវិទ្យាសាស្ត្រជាតិអ៊ុយក្រែន កាលពីថ្ងៃចន្ទ ដែលបានសម្លាប់មនុស្សយ៉ាងហោចណាស់២នាក់។
ប្រភពពីសារព័ត៌មានAl Jazeera។
អាជ្ញាធរក្រុងកៀវបាននិយាយថា មានការផ្ទុះជាច្រើនកន្លែងនៅទូទាំងទីក្រុង។ បំណែកមីស៊ីលបានធ្លាក់នៅក្នុងទីធ្លាអគារមួយ ខណៈអគារមួយទៀតបានឆេះ។
ការវាយប្រហារលើបណ្ឌិត្យសភាវិទ្យាសាស្ត្រជាតិបានបង្កឱ្យមានអគ្គិភ័យធំ។ វីដេអូបង្ហាញថា ដ្រូនបានហោះបុកអគារយ៉ាងលឿន ហើយផ្ទុះ បណ្តាលឱ្យភ្លើងឆេះ និងផ្សែងខ្មៅឡើងលើមេឃ។ មនុស្សនៅក្នុងអគារបាននាំគ្នាចេញមើលតាមបង្អួច។
អគារបណ្ឌិត្យសភាស្ថិតនៅតំបន់ប្រវត្តិសាស្ត្រកណ្តាលក្រុងកៀវ ជិតស្ថានទូតអាល្លឺម៉ង់ វិហារ ល្ខោនជាតិ និងអគាររដ្ឋាភិបាល។
អតីតមន្ត្រីជាន់ខ្ពស់អ៊ុយក្រែន លោក Volodymyr Horbulin បាននិយាយថា លោកនៅធ្វើការក្នុងបណ្ឌិត្យសភាពេលការវាយប្រហារកើតឡើង។ ជំនួយការរបស់លោកដែលនៅក្បែរអគារ ត្រូវបានសម្លាប់ ហើយលោកក៏រងរបួសស្រាលផងដែរ។
បណ្ឌិត្យសភាវិទ្យាសាស្ត្រជាតិអ៊ុយក្រែនបានថ្កោលទោសការវាយប្រហារនេះថា ជាអំពើហិង្សារបស់រុស្ស៊ីប្រឆាំងនឹងប្រជាជនស៊ីវិល៕
