កូរ៉េខាងត្បូងបានទាមទារឱ្យអ៊ុយក្រែន សុំទោស និងបកស្រាយជាផ្លូវការ បន្ទាប់ពីប្រធានាធិបតីអ៊ុយក្រែន Volodymyr Zelenskyy បង្ហាញថា អ៊ុយក្រែនបានបញ្ជូនទាហានកូរ៉េខាងជើង២នាក់ ដែលត្រូវបានចាប់ខ្លួនក្នុងសង្គ្រាមទៅកាន់កូរ៉េខាងត្បូង។
ប្រភពពីសារព័ត៌មានCNA នៅថ្ងៃទី១ខែតុលា។
ទាហានទាំងពីរនាក់ត្រូវបានអ៊ុយក្រែនចាប់ខ្លួននៅតំបន់ Kursk ប្រទេសរុស្ស៊ី កាលពីខែមករា ឆ្នាំ២០២៥ ខណៈកំពុងប្រយុទ្ធជាមួយកងកម្លាំងរុស្ស៊ី។ ពួកគេបានបង្ហាញបំណងចង់ទៅរស់នៅកូរ៉េខាងត្បូង ជំនួសឱ្យការបញ្ជូនត្រឡប់ទៅកូរ៉េខាងជើង។
កូរ៉េខាងត្បូងបានយល់ព្រមទទួលយកពួកគេ ប៉ុន្តែចង់ឱ្យការផ្ទេរនេះ រក្សាជាការសម្ងាត់។ មូលហេតុសំខាន់គឺដើម្បីការពារសុវត្ថិភាពទាហានទាំងពីរ និងសាច់ញាតិរបស់ពួកគេដែលនៅកូរ៉េខាងជើង។ សេអ៊ូលក៏បារម្ភថា ការបង្ហាញព័ត៌មានអាចធ្វើឱ្យការខិតខំស្តារការសន្ទនាជាមួយកូរ៉េខាងជើងកាន់តែពិបាក។
កូរ៉េខាងត្បូងនិយាយថា ភាគីទាំងពីរមានការយល់ព្រមឱ្យរក្សាការផ្ទេរនេះជាសម្ងាត់។ ប៉ុន្តែ អ៊ុយក្រែនបដិសេធថា មិនមានកិច្ចព្រមព្រៀងរក្សាការសម្ងាត់បែបនេះទេ។
មន្ត្រីកូរ៉េខាងត្បូងក៏បានលើកឡើងថា ការបង្ហាញព័ត៌មាននេះអាចមានគោលបំណងជំរុញឱ្យសេអ៊ូលបង្កើនការគាំទ្រដល់អ៊ុយក្រែន ជាពិសេសការផ្តល់ជំនួយយោធា។ កូរ៉េខាងត្បូងជាប្រទេសផលិតអាវុធធំមួយ ប៉ុន្តែរហូតមកដល់ពេលនេះ មិនបានផ្តល់អាវុធសម្រាប់ប្រើប្រយុទ្ធដោយផ្ទាល់ដល់អ៊ុយក្រែនទេ។
ជម្លោះនេះបានធ្វើឱ្យទំនុកចិត្តរវាងរដ្ឋាភិបាលកូរ៉េខាងត្បូង និងអ៊ុយក្រែនមានបញ្ហា។ ទោះជាយ៉ាងណា សេអ៊ូលបាននិយាយថា ជម្លោះនេះមិនគួរប៉ះពាល់ដល់ ជំនួយមនុស្សធម៌ និងកិច្ចសហប្រតិបត្តិការស្តារអ៊ុយក្រែនក្រោយសង្គ្រាម ឡើយ៕
