នៅថ្ងៃទី១ ខែតុលា ឆ្នាំ២០២៦ នាយករដ្ឋមន្ត្រីជប៉ុន Sanae Takaichi បាននិយាយថា រដ្ឋាភិបាលរបស់លោកស្រីនឹងពង្រឹងសមត្ថភាពប្រកួតប្រជែងរបស់សេដ្ឋកិច្ច ដើម្បីបង្កើនទំនុកចិត្តរបស់ទីផ្សារលើប្រាក់យ៉េន។
ប្រភពពីសារព័ត៌មានReuter។
លោកស្រី Takaichi បានបញ្ជាក់ថា លោកស្រីក៏បានប្រាប់ប្រធានាធិបតីអាមេរិក Donald Trump ក្នុងជំនួបកាលពីខែមុនថា ការធ្លាក់ថ្លៃខ្លាំងពេករបស់ប្រាក់យ៉េន គឺជាបញ្ហាមួយសម្រាប់ជប៉ុន។ លោកស្រីថា គោលនយោបាយសេដ្ឋកិច្ចរបស់ជប៉ុនមិនមានគោលបំណងគ្រប់គ្រងអត្រាប្តូរប្រាក់ទេ។
រដ្ឋាភិបាលនឹងផ្តោតការវិនិយោគលើការគ្រប់គ្រងវិបត្តិ និងវិស័យដែលអាចជួយបង្កើនកំណើនសេដ្ឋកិច្ច ដើម្បីបង្កើនសមត្ថភាពផលិត និងការប្រកួតប្រជែងរបស់ជប៉ុននៅលើពិភពលោក។
លោកស្រីក៏បានបញ្ជាក់ថា ជប៉ុននឹងព្យាយាមរក្សាទាំង សេដ្ឋកិច្ចរឹងមាំ និងគោលនយោបាយហិរញ្ញវត្ថុដែលមានចីរភាព។
ទោះជាយ៉ាងណា ការដំឡើងអត្រាការប្រាក់របស់ធនាគារកណ្តាលជប៉ុនមិនទាន់អាចជួយឱ្យប្រាក់យ៉េនឡើងថ្លៃបានច្រើនទេ។ ប្រាក់យ៉េនខ្សោយបានធ្វើឱ្យថ្លៃទំនិញនាំចូលកើនឡើង និងបង្កើនសម្ពាធអតិផរណា។
ផែនការចំណាយដ៏ធំរបស់រដ្ឋាភិបាលក៏ត្រូវបានវិនិយោគិនព្រួយបារម្ភថា អាចធ្វើឱ្យបំណុលរបស់ជប៉ុនកើនឡើង បង្កើនទិន្នផលប័ណ្ណបំណុល និងដាក់សម្ពាធបន្ថែមលើប្រាក់យ៉េន៕
