សហរដ្ឋអាមេរិកកំពុងបង្កើនកម្លាំងយោធានៅមជ្ឈិមបូព៌ា ដោយបញ្ជូនទាហានម៉ារីនប្រហែល ២,០០០នាក់ ទៅតំបន់ជុំវិញប្រទេសអ៊ីរ៉ង់។ មន្ត្រីអាមេរិកម្នាក់បានប្រាប់ Al Jazeera ថា នាវាផ្ទុកយន្តហោះចម្បាំង និងក្រុមនាវាចម្បាំងជាច្រើនកំពុងធ្វើដំណើរទៅតំបន់នេះ។
ប្រភពពីសារព័ត៌មានAl Jazeera នៅថ្ងៃទី២ខែតុលា។
ក្រុម Roosevelt Strike Group និងកម្លាំង Makin Island ដែលមានទាហានម៉ារីនប្រហែល ២,០០០នាក់ បានចាកចេញពីទីក្រុង San Diego សហរដ្ឋអាមេរិក។ មន្ត្រីដដែលនិយាយថា ការបង្កើនកម្លាំងយោធាទាំងមូលត្រូវបានរំពឹងថានឹងបញ្ចប់នៅខែវិច្ឆិកា។
ជាមួយគ្នានេះ អង្គភាពប្រតិបត្តិការពាណិជ្ជកម្មដែនសមុទ្ររបស់ចក្រភពអង់គ្លេស (UKMTO) បាននិយាយថា នាវាដឹកប្រេងធំមួយ ដែលអាចផ្ទុកប្រេងបាន ២.៥លានបារ៉ែល ត្រូវបានវត្ថុមិនស្គាល់អត្តសញ្ញាណវាយប្រហារ ខណៈកំពុងឆ្លងកាត់ច្រកសមុទ្រ Hormuz បណ្តាលឱ្យមានភ្លើងឆេះ។
ចំណែកទីផ្សារប្រេងបានកើនឡើងបន្តិច ដោយតម្លៃប្រេង Brent កើន ២៩សេន ដល់ ១០២.៦០ដុល្លារ ក្នុងមួយបារ៉ែល ខណៈទីផ្សារកំពុងតាមដានភាពតានតឹងជុំវិញអ៊ីរ៉ង់ និងស្ថានភាពផ្គត់ផ្គង់ប្រេងក្នុងតំបន់៕
