ព្យុះហឺរីខេន Isaias ដែលជាព្យុះដំបូងនៃរដូវព្យុះអាត្លង់ទិកឆ្នាំ២០២៦ បានបោកបក់មកដល់ឆ្នេរសមុទ្រភាគខាងជើងនៃឈូងសមុទ្រម៉ិកស៊ិក ក្នុងសហរដ្ឋអាមេរិក កាលពីយប់ថ្ងៃសុក្រ ដោយនាំមកនូវខ្យល់បក់ខ្លាំង និងភ្លៀងធ្លាក់យ៉ាងច្រើន។
ប្រភពពីសារព័ត៌មានAA news នៅថ្ងៃទី១០ខែតុលា។
ព្យុះនេះបានបោកបក់ដល់តំបន់ជិតទីក្រុង Destin រដ្ឋផ្លរីដា ក្នុងកម្រិតព្យុះប្រភេទទី២ មុនពេលថយកម្លាំងទៅជាប្រភេទទី១។ យោងតាមទិន្នន័យរបស់ PowerOutage.us អតិថិជនជាង ៦១០.០០០ កន្លែង នៅរដ្ឋផ្លរីដា និងអាឡាបាម៉ា បានដាច់ចរន្តអគ្គិសនី។
អាជ្ញាធរបានព្រមានពីហានិភ័យទឹកសមុទ្រជន់ឡើងខ្ពស់រហូតដល់ប្រហែល ២,៧ ម៉ែត្រ នៅតំបន់ខ្លះ ព្រមទាំងហានិភ័យទឹកជំនន់ភ្លាមៗ និងខ្យល់ព្យុះកំបុតត្បូង។ រដ្ឋផ្លរីដា ហ្សកហ្ស៊ី និងអាឡាបាម៉ា បានប្រកាសដាក់រដ្ឋក្នុងភាពអាសន្ន ដើម្បីត្រៀមឆ្លើយតបនឹងគ្រោះមហន្តរាយ។
អភិបាលរដ្ឋអាឡាបាម៉ា ក៏បានបញ្ជាឱ្យភ្ញៀវទេសចរ និងអ្នកដែលមិនមែនជាអ្នករស់នៅតំបន់មួយចំនួន ចាកចេញជាបន្ទាន់។ ប៉ុន្តែការជម្លៀសត្រូវបានបញ្ឈប់នៅតំបន់ខ្លះ ដោយសារខ្យល់បក់ខ្លាំងពេក។
អ្នកព្យាករណ៍អាកាសធាតុរំពឹងថា ព្យុះនេះនឹងបន្តថយកម្លាំងនៅថ្ងៃសៅរ៍ ប៉ុន្តែតំបន់ឆ្នេរខ្លះអាចមានភ្លៀងធ្លាក់រហូតដល់ ៣៨ សង់ទីម៉ែត្រ ដែលបង្កហានិភ័យទឹកជំនន់ និងគ្រោះថ្នាក់ដល់អាយុជីវិតប្រជាជន៕
