កាលពីថ្ងៃអាទិត្យ(ទី១១ ខែតុលា ឆ្នាំ២០២៦)ប្រព័ន្ធផ្សព្វផ្សាយរដ្ឋបានដកស្រង់សម្តី របស់ប្រធានផ្នែកសន្តិសុខរបស់អ៊ីរ៉ង់ លោក Mohsen Rezaei ដែលនិយាយថា ការឆ្លើយតបរបស់សហរដ្ឋអាមេរិក ចំពោះលក្ខខណ្ឌចំនួន៧របស់អ៊ីរ៉ង់ នៅក្នុងសំណើបើកច្រកសមុទ្រ Hormuz ឡើងវិញនោះ គឺ «មិនគ្រប់គ្រាន់»នោះទេ។
អ៊ីរ៉ង់ បានដាក់ចេញនូវសំណើមួយ អំឡុងមហាសន្និបាតអង្គការសហប្រជាជាតិ(UNGA) ដែលផ្លូវទឹកនៃច្រកសមុទ្រ Hormuz អាចនឹងត្រូវបានបើកឡើងវិញ និងស្តារការធ្វើដំណើរតាមផ្លូវសមុទ្រជាធម្មតាឡើងវិញ ក្នុងរយៈពេល ៧ថ្ងៃ ប្រសិនបើលក្ខខណ្ឌនានាត្រូវបានបំពេញ ហើយក្រោយមក សហរដ្ឋអាមេរិកបានឆ្លើយតបតាមរយៈអ្នកសម្របសម្រួលមកពីប្រទេសកាតា។
លោក Rezaei លេខាធិការនៃក្រុមប្រឹក្សាសន្តិសុខជាតិជាន់ខ្ពស់ បានបញ្ជាក់ថា ទីក្រុងវ៉ាស៊ីនតោន ចាំបាច់ត្រូវបញ្ជាក់ឱ្យច្បាស់លាស់នូវបញ្ហាដែលនៅមិនទាន់ច្បាស់លាស់ សម្រាប់ទីក្រុងតេអេរ៉ង់។
លោកបន្ថែមថា៖ យើងបានដាក់ចេញនូវលក្ខខណ្ឌចំនួន៧ ដល់ភាគីអាមេរិក ហើយបានបញ្ជាក់យ៉ាងច្បាស់ថា ច្រកសមុទ្រ Hormuz នឹងមិនត្រូវបានបើក សម្រាប់ពួកគេឡើយ ហើយក៏នឹងមិនមានការចរចាណាមួយកើតឡើងដែរ រហូតទាល់តែលក្ខខណ្ឌទាំងនេះត្រូវបានបំពេញ។
សេតវិមាន មិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយពីទីភ្នាក់ងារសារព័ត៌មាន Reuters។
ហើយលោក Rezaei បានបន្ថែមថា អ៊ីរ៉ង់ លែងស្ថិតនៅក្នុងដំណើរការនៃការឆ្លើយតបទៅកាន់ភាគីអាមេរិកទៀតហើយ៕
