ក្រុមយុវជនឥណ្ឌាដែលប្រើឈ្មោះថា«ចលនាកន្លាត»បានប្ដេជ្ញាបន្តធ្វើបាតុកម្ម រហូតដល់ប្រធានគណៈកម្មការរៀបចំការបោះឆ្នោត លោក Gyanesh Kumar លាលែងពីតំណែង។ ការតវ៉ានេះកើតឡើងដោយសារក្រុមអ្នកតវ៉ាសង្ស័យថា មានភាពមិនប្រក្រតីក្នុងការកែសម្រួលបញ្ជីឈ្មោះអ្នកបោះឆ្នោត។
ប្រភពពីសារព័ត៌មានAFP។
កាលពីថ្ងៃអាទិត្យ ទី១១ ខែតុលា ឆ្នាំ២០២៦ មេដឹកនាំចលនាបីនាក់ រួមទាំងស្ថាបនិកគណបក្ស Cockroach Janata Party លោក Abhijeet Dipke ត្រូវបានដោះលែង បន្ទាប់ពីប៉ូលិសឃាត់ខ្លួនពួកគេកាលពីថ្ងៃសៅរ៍ នៅពេលពួកគេទៅចូលរួមបាតុកម្មក្នុងទីក្រុងញូវដែលី។
មេដឹកនាំចលនាបានអំពាវនាវឱ្យប្រជាជនចូលរួមតវ៉ាដោយសន្តិវិធី ហើយបានបញ្ជាក់ថា ពួកគេនឹងមិនបញ្ឈប់ការតវ៉ាទេ។ តាមការរាយការណ៍ មនុស្សរាប់ពាន់នាក់ត្រូវបានឃាត់ខ្លួនក្នុងពេលបាតុកម្ម។
មូលហេតុនៃការតវ៉ា គឺការកែសម្រួលបញ្ជីឈ្មោះអ្នកបោះឆ្នោត ដែលត្រូវបានរាយការណ៍ថា មានឈ្មោះជាង ១៣៣លាននាក់ត្រូវបានដកចេញ។ ក្រុមអ្នកតវ៉ាសង្ស័យថា ការកែសម្រួលនេះអាចផ្ដល់ផលប្រយោជន៍ដល់គណបក្សកាន់អំណាចរបស់នាយករដ្ឋមន្ត្រី Narendra Modi និងប៉ះពាល់ដល់សិទ្ធិបោះឆ្នោតរបស់ជនជាតិភាគតិច ជាពិសេសប្រជាជនមូស្លីម។
ប៉ុន្តែគណៈកម្មការរៀបចំការបោះឆ្នោតបានបដិសេធការចោទប្រកាន់នេះ ដោយបញ្ជាក់ថា ការដកឈ្មោះចេញមានគោលបំណងលុបឈ្មោះស្ទួន ឈ្មោះអ្នកស្លាប់ និងឈ្មោះក្លែងក្លាយប៉ុណ្ណោះ។
ចំណែកអង្គការសហប្រជាជាតិបានអំពាវនាវឱ្យដោះលែងអ្នកដែលត្រូវបានឃាត់ខ្លួនដោយអយុត្តិធម៌។ រីឯតុលាការកំពូលឥណ្ឌាក៏បានណែនាំឱ្យអាជ្ញាធរមិនត្រូវឃាត់ខ្លួនអ្នកដែលធ្វើបាតុកម្មដោយសន្តិវិធីដោយខុសច្បាប់ឡើយ៕
