ប្រទេសអារ៉ាប៊ីសាអូឌីតបានបដិសេធសំណើរបស់អ៊ីស្រាអែលដែលចង់ចូលរួមក្នុងប្រតិបត្តិការយោធាប្រឆាំងនឹងក្រុមហ៊ូធីនៅប្រទេសយេម៉ែន។ នេះបើយោងតាមសារព័ត៌មានអ៊ីស្រាអែល Haaretz ដែលបានចុះផ្សាយកាលពីថ្ងៃទី១២ ខែតុលា ឆ្នាំ២០២៦។
ប្រភពពីសារព័ត៌មានAA news។
តាមប្រភពការទូតមួយដែលសារព័ត៌មាន Haaretz បានដកស្រង់ ព្រះអង្គម្ចាស់ Mohammed bin Salman មិនចង់ឱ្យអ៊ីស្រាអែលចូលរួមជួយផ្នែកយោធាទេ ព្រោះបារម្ភថា កិច្ចសហប្រតិបត្តិការនេះអាចធ្វើឱ្យប្រជាជនអារ៉ាប៊ីសាអូឌីតមិនពេញចិត្ត។
របាយការណ៍បានបញ្ជាក់ថា អ៊ីស្រាអែលបានព្យាយាមស្នើសុំការយល់ព្រមពីអារ៉ាប៊ីសាអូឌីត តាមរយៈការសម្របសម្រួលរបស់សហរដ្ឋអាមេរិក។ អ៊ីស្រាអែលសង្ឃឹមថា ការសហការផ្នែកយោធាអាចជួយពង្រឹងទំនាក់ទំនងរវាងប្រទេសទាំងពីរ និងបើកផ្លូវឱ្យមានការបង្កើតទំនាក់ទំនងការទូតជាផ្លូវការនាពេលអនាគត។
បច្ចុប្បន្ន អារ៉ាប៊ីសាអូឌីតមិនទាន់មានទំនាក់ទំនងការទូតជាមួយអ៊ីស្រាអែលទេ ហើយបានបញ្ជាក់ថា ការបង្កើតទំនាក់ទំនងជាមួយអ៊ីស្រាអែលត្រូវពាក់ព័ន្ធនឹងការដោះស្រាយបញ្ហាប៉ាឡេស្ទីន រួមទាំងការបង្កើតរដ្ឋប៉ាឡេស្ទីនឯករាជ្យ។
ព័ត៌មាននេះកើតឡើងក្នុងពេលដែលការវាយប្រហាររបស់ក្រុមហ៊ូធីលើអារ៉ាប៊ីសាអូឌីតកំពុងកើនឡើង ជាពិសេសការវាយប្រហារលើអាកាសយានដ្ឋាន ដែលបណ្តាលឱ្យមានអ្នកស្លាប់ និងរបួស ព្រមទាំងរំខានដល់ជើងហោះហើរ។
សង្គ្រាមនៅយេម៉ែនបានចាប់ផ្តើមតាំងពីឆ្នាំ២០១៤ នៅពេលក្រុមហ៊ូធីដណ្តើមកាន់កាប់រដ្ឋធានីសាណា និងតំបន់ជាច្រើនទៀត។ នៅឆ្នាំ២០១៥ អារ៉ាប៊ីសាអូឌីតបានដឹកនាំសម្ព័ន្ធយោធាចូលធ្វើអន្តរាគមន៍ ដើម្បីគាំទ្ររដ្ឋាភិបាលយេម៉ែនដែលទទួលស្គាល់ដោយអន្តរជាតិ៕
