នៅថ្ងៃព្រហស្បតិ៍ទី១៥.១០.២០២៦ អ៊ុយក្រែន បានវាយប្រហាររោងចក្រចម្រាញ់ប្រេងមួយរបស់រុស្ស៊ី! ដោយអ៊ុយក្រែន សម្រេចបោះបង់ចោលបទឈប់បាញ់រយៈពេលខ្លីពាក់ព័ន្ធនឹងគោលដៅហេដ្ឋារចនាសម្ព័ន្ធថាមពល។
សារព័ត៌មាន(AP)។
អ៊ុយក្រែន បានអះអាងថា ទីក្រុងមូស្គូមិនបានគោរពតាមបទឈប់បាញ់នេះទេ។
ជាមួយគ្នានេះ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី (Volodymyr Zelenskyy) បានថ្លែងថា លោកមានអារម្មណ៍ថា.ត្រូវបានប្រធានាធិបតីអាមេរិក លោក ដូណាល់ ត្រាំ(Donald Trump)ក្បត់។
យោងតាមក្រសួងការពារជាតិរុស្ស៊ី និងអភិបាលតំបន់ Ryazan លោក Pavel Malkov ការវាយប្រហារដោយយន្តហោះដ្រូន(drone)បានបង្កឱ្យមានអគ្គិភ័យឆាបឆេះ នៅរោងចក្រចម្រាញ់ប្រេងមួយ។
ដែលស្ថិតនៅចម្ងាយប្រហែល៣០០ គីឡូម៉ែត្រ(១៨០ ម៉ាយ) ភាគអាគ្នេយ៍នៃទីក្រុងមូស្គូ ក្នុងតំបន់ Ryazanរបស់រុស្ស៊ី។
ទីភ្នាក់ងារព័ត៌មានអនឡាញ Astra របស់រុស្ស៊ី បានបង្ហោះរូបភាពមួយដែលគេអះអាងថា ជាហេតុការណ៍ឆាបឆេះនោះ។
ការវាយប្រហារនេះអាចធ្វើឱ្យទំនាក់ទំនងរវាងទីក្រុងគៀវ និងលោក ត្រាំ កាន់តែមានភាពស្មុគស្មាញថែមទៀត។
ខណៈដែលទំនាក់ទំនងនេះបានធ្លាក់ចុះដុនដាបម្តងទៀត ក្នុងរយៈពេលប៉ុន្មានថ្ងៃថ្មីៗនេះ ស្របពេលដែលភាពតានតឹងជាមួយទីក្រុងវ៉ាស៊ីនតោន កំពុងកើនឡើង។
លោក ហ្សេឡេនស្គី បានថ្លែងថា លោកមានកំហឹងយ៉ាងខ្លាំង ការដែលរុស្ស៊ីនៅតែបន្តទម្លាក់គ្រាប់បែកតាមអាកាសលើហេដ្ឋារចនាសម្ព័ន្ធថាមពលរបស់ប្រទេសលោក។
សកម្មភាពនេះហាក់ដូចជាប្រឆាំងនឹងការទាមទាររបស់លោក ត្រាំ កាលពីថ្ងៃអាទិត្យ ដែលបានស្នើឱ្យភាគីទាំងសងខាងបញ្ឈប់ការវាយប្រហារបែបនេះ។
លោក ហ្សេឡេនស្គី បានត្អូញត្អែរថា ទោះបីជាអ៊ុយក្រែន បានយល់ព្រមតាមការទាមទាររបស់លោក ត្រាំ ឱ្យមានបទឈប់បាញ់។
ប៉ុន្តែក្នុងរយៈពេលប៉ុន្មានថ្ងៃថ្មីៗនេះ អ៊ុយក្រែន បែរជាមិនទទួលបានព័ត៌មានចារកម្មពីលោកខាងលិចដូចធ្លាប់ទទួលបានពីមុនមក ពាក់ព័ន្ធនឹងការវាយប្រហារដោយមីស៊ីលផ្លោងរបស់រុស្ស៊ី។
លើសពីនេះ ក៏មានការដាក់កម្រិតលើការប្រើប្រាស់ប្រព័ន្ធទំនាក់ទំនង Starlink ដែលផលិតដោយសហរដ្ឋអាមេរិកផងដែរ។
ទាំងព័ត៌មានចារកម្ម និងប្រព័ន្ធទំនាក់ទំនងនេះ សុទ្ធតែមានសារៈសំខាន់យ៉ាងខ្លាំងសម្រាប់កងទ័ពអ៊ុយក្រែន។
លោកបានថ្លែងថា ការអត់ធ្មត់របស់លោកបានអស់ហើយ ដោយបានប្រាប់សារព័ត៌មាន Financial Times នៅក្នុងបទសម្ភាសន៍មួយដែលបានចុះផ្សាយកាលពីថ្ងៃព្រហស្បតិ៍ថា អ៊ុយក្រែននឹងបន្តការវាយប្រហារលើរោងចក្រចម្រាញ់ប្រេងរបស់រុស្ស៊ីឡើងវិញ។
លោក ហ្សេឡេនស្គី ត្រូវបានដកស្រង់សម្តីថា៖«យើងឈប់អត់ធ្មត់ហើយ»។
មន្ត្រីជាន់ខ្ពស់អ៊ុយក្រែនម្នាក់ ដែលសុំមិនបញ្ចេញឈ្មោះដោយសារមិនមាន ចំណុចនៃភាពតានតឹងមួយទៀតជាមួយអ៊ុយក្រែន គឺកិច្ចព្រមព្រៀងមួយដែលលោក ត្រាំ បានធ្វើឡើងជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន ដើម្បីនាំចូលប្រេងម៉ាស៊ូតពីរុស្ស៊ី ទោះបីជាមានកិច្ចខិតខំប្រឹងប្រែងជាអន្តរជាតិក្នុងការដាក់ទណ្ឌកម្មលើរុស្ស៊ីចំពោះការឈ្លានពានរបស់ខ្លួន និងការឯកោលោក ពូទីន ផ្នែកការទូតក៏ដោយ។
លោក ហ្សេឡេនស្គី បានរិះគន់យ៉ាងខ្លាំងចំពោះកិច្ចព្រមព្រៀងនេះ ដោយលើកឡើងថា វានឹងអនុញ្ញាតឱ្យរុស្ស៊ីបន្តការឈ្លានពានទ្រង់ទ្រាយធំលើអ៊ុយក្រែន ដែលបានចាប់ផ្តើមកាលពីជាង៤ ឆ្នាំកន្លះមុន។
កិច្ចខិតខំប្រឹងប្រែងរបស់សហរដ្ឋអាមេរិកក្រោមការដឹកនាំរបស់លោក ត្រាំ ដើម្បីបញ្ចប់សង្គ្រាមនេះ គឺមិនមានវឌ្ឍនភាពអ្វីឡើយ៕
