រដ្ឋមន្ត្រីការបរទេសរុស្ស៊ី លោក Sergey Lavrov បានមកដល់ប្រទេសបារ៉ែនកាលពីថ្ងៃសៅរ៍ទី១៧.១០.២០២៦ ដើម្បីចូលរួមក្នុងកិច្ចប្រជុំមួយរវាងទីក្រុងមូស្គូ និងក្រុមប្រឹក្សាសហប្រតិបត្តិការឈូងសមុទ្រ (GCC)។
សារព័ត៌មានAnadolu។
ការមកដល់របស់លោក Lavrov នៅទីក្រុងម៉ាណាម៉ា (Manama) ដែលជារដ្ឋធានីនៃប្រទេសបារ៉ែន ត្រូវបានប្រកាសនៅក្នុងសេចក្តីថ្លែងការណ៍មួយរបស់ក្រសួងការបរទេស រួមជាមួយនឹងរូបភាពដែលបង្ហាញពីមន្ត្រីនានាកំពុងទទួលស្វាគមន៍រូបលោក។
លោក Lavrov ត្រូវបានទទួលស្វាគមន៍ដោយសមភាគីបារ៉ែន របស់លោក គឺលោក Abdullatif bin Rashid Al Zayani ព្រមទាំងអគ្គលេខាធិការ GCC លោក Jasem Mohamed Al-Budaiwi និងឯកអគ្គរដ្ឋទូតរុស្ស៊ីប្រចាំទីក្រុងម៉ាណាម៉ា លោក Alexey Skosyrev។
ដំណើរទស្សនកិច្ចនេះ ធ្វើឡើងនៅពេលដែលប្រទេសក្នុងតំបន់ឈូងសមុទ្រមួយនេះ កំពុងរៀបចំធ្វើជាម្ចាស់ផ្ទះរៀបចំកិច្ចសន្ទនាយុទ្ធសាស្ត្ររុស្ស៊ី-GCC លើកទី៩ នៅកម្រិតរដ្ឋមន្ត្រីការបរទេស ដែលកិច្ចប្រជុំលើកមុនត្រូវបានធ្វើឡើងនៅទីក្រុងរមណីយដ្ឋាន Sochi របស់រុស្ស៊ី កាលពីខែកញ្ញា ឆ្នាំ២០២៥។
អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានថ្លែងនៅក្នុងសន្និសីទសារព័ត៌មានមួយកាលពីថ្ងៃព្រហស្បតិ៍ថា កិច្ចប្រជុំនេះនឹងក្លាយជាវេទិកាសម្រាប់ការផ្លាស់ប្តូរទស្សនៈលើបញ្ហាអន្តរជាតិ និងតំបន់ជាច្រើន។ លោកស្រីបានបន្ថែមថា លោក Lavrov ក៏នឹងមានកិច្ចប្រជុំផ្សេងទៀតនៅក្រៅកម្មវិធីផ្លូវការផងដែរ៕
