ប្រធានាធិបតីបារាំង លោក Emmanuel Macron កាលពីថ្ងៃអាទិត្យទី១៨.១០.២០២៦បានសង្កត់ធ្ងន់ថា ចាំបាច់ក្នុងការរក្សាច្បាប់ និងសណ្តាប់ធ្នាប់ ព្រមទាំងស្តារភាពស្ងប់ស្ងាត់ឡើងវិញ មន្ត្រីរដ្ឋបាលតំបន់ (Prefects) នឹងហាមឃាត់ការតវ៉ា ស្របពេលដែល បាតុកម្មហិង្សា ឈានដល់ ចាប់ខ្លួនជាង២.៤០០នាក់ ខណៈសមត្ថកិច្ចរបួសជាង១.០០០នាក់!
សារព័ត៌មានAnadolu។
លោក Macron បានថ្លែងទៅកាន់ប្រជាជាតិពីវិមាន Élysée ក្នុងទីក្រុងប៉ារីស បន្ទាប់ពីមានការតវ៉ាទ្រង់ទ្រាយធំនៅទូទាំងប្រទេស កាលពីថ្ងៃសៅរ៍ ដែលរៀបចំឡើងដោយចលនា «អាវកាក់ពណ៌លឿង»(Yellow Vest) ជាមួយនឹងការគាំទ្រ ពីសហជីពនិស្សិត និងសហជីពកម្មករ ដែលការតវ៉ានេះបានវិវត្តទៅជាការបំផ្លិចបំផ្លាញយ៉ាងធ្ងន់ធ្ងរនៅក្នុងទីក្រុងនានា។
លោក មានប្រសាសន៍ថា៖«បងប្អូនជនរួមជាតិទាំងឡាយ ខ្ញុំថ្លែងទៅកាន់បងប្អូននៅល្ងាចនេះ ក្នុងគ្រាដ៏ធ្ងន់ធ្ងរមួយ»។
លោក Macron បាននិយាយថា៖ «កាលពីម្សិលមិញ ថ្ងៃសៅរ៍ទី១៧ ខែតុលា ក្រុមជ្រុលនិយមឆ្វេងនិយម រួមជាមួយឧក្រិដ្ឋជនជាច្រើន ដែលបានចូលរួមក្នុងសកម្មភាពរបស់ពួកគេ បានបង្កអំពើហិង្សា ដែលមិនអាចគ្រប់គ្រងបាន នៅក្នុងទីក្រុងនានារបស់យើង»។
លោក អំពាវនាវដល់គណបក្សនយោបាយ និងសហជីពនានា ឱ្យថ្កោលទោសអំពើហិង្សានេះ យ៉ាងដាច់អហង្ការ។
លោកក៏បានសង្កត់ធ្ងន់ផងដែរថា មន្ត្រីរដ្ឋបាលតំបន់ អាចចាត់វិធានការនានា រួមទាំងការហាមឃាត់ ការតវ៉ាមួយចំនួន ដើម្បីការពារទីក្រុងរបស់ពួកគេ។
លោក Macron មានប្រសាសន៍ថា៖ «ប្រទេសជាតិ ត្រូវការសណ្តាប់ធ្នាប់ និងភាពស្ងប់ស្ងាត់ មិនមែនការកើនឡើងនៃភាពតានតឹងនោះទេ»។
លោកបានកត់សម្គាល់ថា ហាងលក់ទំនិញជាច្រើន ត្រូវបានគេលួចប្លន់ ហើយហាងទំនិញ អគារសាធារណៈ និងអគាររដ្ឋបាលក្រុងនានា ក៏ត្រូវបានគេវាយប្រហារផងដែរ។
«តើជនជាតិបារាំង អាចធ្វើបែបនេះចំពោះប្រទេសបារាំងដោយរបៀបណា?»។
លោក មានប្រសាសន៍ថា៖ «ការឃើញផ្លូវថ្នល់ក្នុងទីក្រុងនានា របស់យើងត្រូវបានបំផ្លិចបំផ្លាញបែបនេះ គឺជារឿងដែលមិនអាចទទួលយកបានឡើយ»។
លោកបានបន្ថែមថា មនុស្សគ្រប់គ្នាសុទ្ធតែមានអារម្មណ៍ខឹងសម្បារ និងខ្មាសអៀនចំពោះអ្វីដែលបានកើតឡើង។
លោកបានលើកឡើងថា លោកមិនអាចយល់បានឡើយចំពោះការដុតបំផ្លាញសាលាក្រុង Limoges ការដុតការិយាល័យទេសចរណ៍នៅទីក្រុង Lyon ការសម្រុកចូលរបស់ក្រុមអ្នកតវ៉ាទៅក្នុងអគាររដ្ឋបាលក្រុង Marseille ឬការវាយប្រហារ លើលំនៅឋានរបស់មន្ត្រីរដ្ឋបាលតំបន់ (Prefect) នៅទីក្រុង Bordeaux។
លោកបាននិយាយថា៖ «តើពួកគេអាចធ្វើរឿងដល់កម្រិតនេះបានដោយរបៀបណា? គ្មានអ្វីអាចយកមកធ្វើជាហេតុផលត្រឹមត្រូវសម្រាប់រឿងនេះបានទេ។
គ្មានអ្វីអាចពន្យល់វាបានទេ គ្មានអ្វីអាចលើកលែងឱ្យបានឡើយ»។
លោក Macron បន្ថែមថា លោក Sebastien Lecornu នឹងដឹកនាំកិច្ចប្រជុំបន្ទាន់មួយនៅថ្ងៃបន្ទាប់ ដើម្បីផ្តល់ជំនួយដល់ម្ចាស់អាជីវកម្មនានា ឱ្យបានឆាប់រហ័សបំផុត។
លោក Macron បានមានប្រសាសន៍ថា មន្ត្រីអនុវត្តច្បាប់បានជួបប្រទះនឹងអំពើហិង្សាកម្រិតធ្ងន់ធ្ងរដែលមិនធ្លាប់មានពីមុនមកនៅក្នុងទីក្រុងជាច្រើនកាលពីថ្ងៃសៅរ៍ ប៉ុន្តែពួកគេ«នៅតែឈរជើងយ៉ាងរឹងមាំ និងបានខិតខំប្រឹងប្រែងអស់ពីសមត្ថភាព»។
លោកបញ្ជាក់ថា នៅក្នុងថ្ងៃខាងមុខ លោក Lecornu នឹងកោះហៅតំណាងគណបក្សនយោបាយ សហជីពកម្មករ ព្រមទាំងសិស្សវិទ្យាល័យ និងនិស្សិតសាកលវិទ្យាល័យឱ្យមកជួបជុំគ្នា។
លោក ក៏បានអំពាវនាវឱ្យមានតម្លាភាពទាក់ទងនឹងយុទ្ធសាស្ត្ររបស់រដ្ឋាភិបាលក្នុងការរក្សាសណ្តាប់ធ្នាប់សាធារណៈផងដែរ។
លោក មានប្រសាសន៍ថា៖ «ខ្ញុំបានណែនាំឱ្យរដ្ឋាភិបាល ដកស្រង់មេរៀនចាំបាច់ទាំងអស់ ទាក់ទងនឹងការប្រមូលព័ត៌មានសម្ងាត់ និងការត្រៀមទុកជាមុន ដើម្បីធានាថាហេតុការណ៍បែបនេះនឹងមិនកើតឡើងម្តងទៀតឡើយ»។
លោកបានបន្ថែមថា លោកចង់បានចម្លើយច្បាស់លាស់ និងការស៊ើបអង្កេតលើព្រឹត្តិការណ៍ដែលបានកើតឡើងជុំវិញការតវ៉ាទាំងនោះ។
លោក Macron ក៏បានកត់សម្គាល់ផងដែរថា រដ្ឋមន្ត្រីក្រសួងយុត្តិធម៌ លោក Gerald Darmanin បានណែនាំដល់ព្រះរាជអាជ្ញាឱ្យចាត់វិធានការយ៉ាងម៉ឺងម៉ាត់ចំពោះបញ្ហានេះ។
លោកបានថ្លែងថា៖«អ្នកដែលបំផ្លិចបំផ្លាញទ្រព្យសម្បត្តិ ត្រូវតែទទួលខុសត្រូវលើការចំណាយ។
អ្នកដែលលួចប្លន់ ត្រូវតែសងការខូចខាត ហើយអ្នកដែលប៉ុនប៉ងផ្តួលរំលំសាធារណរដ្ឋ ត្រូវតែទទួលខុសត្រូវចំពោះទង្វើរបស់ខ្លួន»។
លោក Macron បានសង្កត់ធ្ងន់ថា ចាំបាច់ត្រូវមានការបែងចែកឱ្យដាច់រវាងអ្នកដែលប្រព្រឹត្តអំពើដុតបំផ្លាញ និងបំផ្លិចបំផ្លាញទ្រព្យសម្បត្តិ ជាមួយក្រុមអ្នកតវ៉ា។
លោកបានបន្ថែមថា លោកយល់ពីក្តីបារម្ភដែលក្រុមអ្នកតវ៉ាបានលើកឡើង ពាក់ព័ន្ធនឹងការចំណាយលើការរស់នៅ និងតម្លៃប្រេងឥន្ធនៈដ៏ខ្ពស់។
លោកបានលើកឡើងថា ដើមហេតុនៃក្តីបារម្ភទាំងនេះគឺបណ្តាលមកពីសង្គ្រាមដែលបានចាប់ផ្តើមឡើង តាមរយៈការវាយប្រហាររបស់សហរដ្ឋអាមេរិក និងអ៊ីស្រាអែលទៅលើប្រទេសអ៊ីរ៉ង់ ដោយសង្កត់ធ្ងន់ថា ប្រទេសបារាំងបានចាត់វិធានការនានាដើម្បីធានាការផ្គត់ផ្គង់ប្រេងរបស់ខ្លួន។
លោកមានប្រសាសន៍ថា៖ «ខ្ញុំយល់ពីសិស្សវិទ្យាល័យ និងនិស្សិតសាកលវិទ្យាល័យរបស់យើង»ដោយបន្ថែមថា សំឡេងរបស់ពួកគេចាំបាច់ត្រូវតែត្រូវបានគេស្តាប់ឮ។
លោក Macron បានលើកឡើងថា រដ្ឋាភិបាលមានទំនួលខុសត្រូវក្នុងការស្តាប់នូវកំហឹងនេះ ដោះស្រាយមូលហេតុដើមនៃបញ្ហា និងការពារសាធារណរដ្ឋក្នុងពេលតែមួយ។
លោកបញ្ជាក់យ៉ាងច្បាស់ថា អាជ្ញាធរនឹងមិនធ្វើការសម្របសម្រួល ឬផ្តល់ការអនុគ្រោះណាមួយដល់អ្នកដែលដុតបំផ្លាញទ្រព្យសម្បត្តិ និងប្រព្រឹត្តអំពើបំផ្លិចបំផ្លាញក្នុងអំឡុងពេលនៃការតវ៉ានោះឡើយ។
លោកបាននិយាយថា ប្រទេសបារាំងសមនឹងទទួលបានការរៀបចំការបោះឆ្នោតជ្រើសរើសប្រធានាធិបតីមួយដ៏ត្រឹមត្រូវក្នុងរយៈពេល៦ ខែខាងមុខ ដូចដែលបានគ្រោងទុក។
លោកថា មនុស្សប្រហែល២.៤០០ នាក់ត្រូវបានឃាត់ខ្លួននៅទូទាំងប្រទេស ខណៈដែលមន្ត្រីប៉ូលិស កងរាជអាវុធហត្ថ និងអ្នកពន្លត់អគ្គិភ័យប្រហែល ១.០០០នាក់បានរងរបួស។
ក្នុងអំឡុងពេលនៃការតវ៉ានេះ អ្នកតវ៉ាម្នាក់បានស្លាប់បន្ទាប់ពីមានអាការៈឈឺធ្ងន់នៅទីក្រុងប៉ារីស ចំណែកឯយុវជនម្នាក់អាយុ១៧ឆ្នាំវិញ ត្រូវបានគ្រាប់បែកសម្រាប់បង្ក្រាបហ្វូងមនុស្សផ្ទុះដាច់ដៃស្តាំ នៅទីក្រុង Saint-Etienne ស្ថិតនៅភាគខាងត្បូងនៃប្រទេស៕
