អាជ្ញាធរខេត្តតៃស(Taiz) ភាគនិរតីប្រទេសយេម៉ែន បានរាយការណ៍ថា ក្នុងខែតុលា ឆ្នាំ២០២៦ មានករណីជំងឺចំនួន៥.០២៥ករណី ដែលភាគច្រើនជាជំងឺឆ្លង ជំងឺផ្លូវដង្ហើម និងគ្រុនក្តៅ។ អាជ្ញាធរបានភ្ជាប់ការកើនឡើងនៃជំងឺទាំងនេះ ទៅនឹងសំរាមដែលកកស្ទះតាមដងផ្លូវ លំនៅឋាន និងប្រព័ន្ធលូ ដោយសារការប្រយុទ្ធគ្នា បានរារាំងការដឹកជញ្ជូនសំរាម។
សារព័ត៌មានAnadolu Agency នៅថ្ងៃទី៥ខែវិច្ឆិកា។
មន្ត្រីសុខាភិបាលក្នុងខេត្តបានចោទប្រកាន់ក្រុមហ៊ូទីថា បានរារាំងរថយន្តដឹកសំរាមមិនឱ្យចូលទៅកាន់ទីលានចាក់សំរាមបណ្តោះអាសន្ន។ ពួកគេក៏បានអំពាវនាវឱ្យអង្គការសហប្រជាជាតិជួយអន្តរាគមន៍ ដើម្បីដោះស្រាយបញ្ហានេះ។
ជាមួយគ្នានេះ ការប្រយុទ្ធគ្នាបានបង្ខំឱ្យគ្រួសារចំនួន៦.៤០០គ្រួសារភៀសខ្លួនមកកាន់ទីក្រុងតៃស ធ្វើឱ្យចំនួនគ្រួសារភៀសខ្លួនសរុបនៅក្នុងទីក្រុងកើនដល់ ៣៩.៤០០គ្រួសារ និងបង្កើនសម្ពាធលើសេវាសាធារណៈដែលមានស្រាប់។
ក្នុងហេតុការណ៍មួយទៀត ការបាញ់ផ្លោងរបស់កងកម្លាំងហ៊ូទីទៅលើផ្ទះប្រជាពលរដ្ឋក្នុងស្រុកហៃហ្វាន បានសម្លាប់កុមារី ៣នាក់ អាយុ ៣ឆ្នាំ ៧ឆ្នាំ និង ១២ឆ្នាំ ព្រមទាំងស្ត្រីម្នាក់អាយុ ៣៥ឆ្នាំ មនុស្ស៤នាក់ផ្សេងទៀតបានរងរបួស។
មជ្ឈមណ្ឌលសិទ្ធិមនុស្សតៃសបានឱ្យដឹងថា ក្នុងរយៈពេល ៤សប្តាហ៍ចុងក្រោយនេះ ជនស៊ីវិលជាង៥០នាក់បានស្លាប់ និងរាប់សិបនាក់ទៀតរងរបួស ដោយសារការបាញ់ផ្លោង ការបាញ់សម្លាប់ពីចម្ងាយ និងការផ្ទុះមីន។
គួរបញ្ជាក់ថា ប្រទេសយេម៉ែនបានធ្លាក់ក្នុងសង្គ្រាមចាប់តាំងពីឆ្នាំ២០១៤ បន្ទាប់ពីក្រុមហ៊ូទីដណ្តើមកាន់កាប់រដ្ឋធានីសាណា។ ចាប់តាំងពីខែកក្កដា ឆ្នាំ២០២៦ ការប្រយុទ្ធគ្នាបានកើនឡើងវិញ បណ្តាលឱ្យមនុស្សរាប់ពាន់នាក់ស្លាប់ និងរងរបួស ព្រមទាំងប្រជាជនជាង ២៥ម៉ឺននាក់ត្រូវភៀសខ្លួន ស្ថានភាពនេះបានធ្វើឱ្យវិបត្តិមនុស្សធម៌ក្នុងប្រទេសកាន់តែធ្ងន់ធ្ងរ៕
