កងទ័ពអ៊ីរ៉ង់បានព្រមានកាលពីថ្ងៃសុក្រថា សហរដ្ឋអាមេរិកអាចនឹងបើកការវាយប្រហារយោធាជាថ្មីលើប្រទេសអ៊ីរ៉ង់ ទោះបីមានសេចក្តីរាយការណ៍ថា នាវាចម្បាំងអាមេរិកបានដកចេញពីតំបន់ក៏ដោយ។
សារព័ត៌មានAnadolu Agency នៅថ្ងៃទី៧ខែវិច្ឆិកា។
អ្នកនាំពាក្យកងទ័ពអ៊ីរ៉ង់ លោកឧត្តមសេនីយ៍ទោ Mohammad Akraminia បានលើកឡើងថា មិនអាចបដិសេធលទ្ធភាពនៃការវាយប្រហារជាថ្មីពីអាមេរិកបានទេ។ លោកព្រមានថា ប្រសិនបើអាមេរិកវាយប្រហារម្តងទៀត កងកម្លាំងអ៊ីរ៉ង់នឹងឆ្លើយតបយ៉ាងខ្លាំងក្លា និងភ្លាមៗ។
លោកក៏បានបញ្ជាក់ថា មូលដ្ឋានទ័ព និងផលប្រយោជន៍របស់អាមេរិកនៅក្រៅតំបន់មជ្ឈិមបូព៌ា និងតំបន់ឈូងសមុទ្រ ក៏អាចស្ថិតក្នុងរង្វង់គោលដៅវាយប្រហារដោយមីស៊ីល និងដ្រូនរបស់អ៊ីរ៉ង់ផងដែរ។
ជាមួយគ្នានេះ អ៊ីរ៉ង់បានអះអាងថា ខ្លួននៅតែគ្រប់គ្រងជាយុទ្ធសាស្ត្រលើច្រកសមុទ្រ Hormuz ហើយនឹងមិនបើកច្រកនេះឡើងវិញទេ រហូតដល់លក្ខខណ្ឌរបស់ខ្លួនត្រូវបានបំពេញ។
គួរបញ្ជាក់ថា អាមេរិក និងអ៊ីស្រាអែលបានចាប់ផ្តើមវាយប្រហារយោធាលើអ៊ីរ៉ង់កាលពីថ្ងៃទី២៨ ខែកុម្ភៈ។ ទោះបីភាគីទាំងពីរបានឈានដល់បទឈប់បាញ់ក្នុងខែមេសា និងមានកិច្ចព្រមព្រៀងអនុស្សរណៈក្នុងខែមិថុនា ដើម្បីស្វែងរកដំណោះស្រាយសន្តិភាពក៏ដោយ ក៏ជម្លោះនេះនៅមិនទាន់ត្រូវបានដោះស្រាយនៅឡើយ៕
