ប្រទេសសមាជិកសហភាពអឺរ៉ុបចំនួន៥ រួមមាន អាល្លឺម៉ង់ អូទ្រីស ដាណឺម៉ាក ក្រិក និងហូឡង់ បានប្រកាសថា កំពុងពិភាក្សាជាមួយប្រទេសរវ៉ាន់ដា ដើម្បីបង្កើតមជ្ឈមណ្ឌលទទួលជនចំណាកស្រុកដែលត្រូវបញ្ជូនចេញពីអឺរ៉ុប ដោយមានគោលដៅចាប់ផ្តើមអនុវត្តនៅឆ្នាំ២០២៧។
សារព័ត៌មានAnadolu Agency។
គម្រោងនេះមានគោលបំណងបញ្ជូនជនបរទេសដែលគ្មានសិទ្ធិស្នាក់នៅស្របច្បាប់ក្នុងប្រទេសទាំង៥ ទៅកាន់ប្រទេសរវ៉ាន់ដា បន្ទាប់ពីទទួលបានសេចក្តីសម្រេចឱ្យចាកចេញពីប្រទេស។ ទោះជាយ៉ាងណា គម្រោងនេះមិនអនុវត្តចំពោះអនីតិជនដែលគ្មានអ្នកអមដំណើរនោះទេ។
នៅពេលទៅដល់ប្រទេសរវ៉ាន់ដា ជនចំណាកស្រុកនឹងមានជម្រើសក្នុងការរស់នៅ និងចូលរួមក្នុងសង្គមរវ៉ាន់ដា ឬស្ម័គ្រចិត្តត្រឡប់ទៅប្រទេសកំណើត ឬទៅរស់នៅប្រទេសផ្សេងទៀតដែលពួកគេមានសិទ្ធិស្នាក់នៅស្របច្បាប់។ អង្គការអន្តរជាតិ និងអង្គការអន្តោប្រវេសន៍អន្តរជាតិ (IOM) នឹងចូលរួមជួយគាំទ្រដល់ដំណើរការនេះ។
ទោះបីជាយ៉ាងណា គម្រោងនេះកំពុងបង្កើតការព្រួយបារម្ភអំពីសិទ្ធិមនុស្ស និងសុវត្ថិភាពរបស់ជនចំណាកស្រុក ដោយនៅមិនទាន់មានភាពច្បាស់លាស់អំពីទីកន្លែងស្នាក់នៅ សិទ្ធិធ្វើការ សេរីភាពក្នុងការធ្វើដំណើរ និងរយៈពេលដែលពួកគេអាចរស់នៅក្នុងប្រទេសរវ៉ាន់ដាបាននៅឡើយទេ។
តាមច្បាប់អន្តរជាតិ ប្រទេសដែលបញ្ជូនជនចំណាកស្រុកចេញ មិនអាចបញ្ជូនពួកគេទៅកាន់ទីកន្លែងដែលមានហានិភ័យនៃការធ្វើទុក្ខបុកម្នេញ ការធ្វើទារុណកម្ម ឬការរំលោភបំពានធ្ងន់ធ្ងរលើសិទ្ធិមនុស្សបានឡើយ។ ជនចំណាកស្រុកក៏មានសិទ្ធិស្នើសុំការការពារ និងប្តឹងតវ៉ាចំពោះការសម្រេចបញ្ជូនពួកគេចេញផងដែរ។
គួរបញ្ជាក់ថា កាលពីខែវិច្ឆិកា ឆ្នាំ២០២៣ តុលាការកំពូលចក្រភពអង់គ្លេសបានសម្រេចថា គម្រោងបញ្ជូនអ្នកស្វែងរកសិទ្ធិជ្រកកោនទៅប្រទេសរវ៉ាន់ដារបស់រដ្ឋាភិបាលអង់គ្លេស គឺខុសច្បាប់ ដោយសារមានហានិភ័យដែលពួកគេអាចត្រូវបានបញ្ជូនបន្តទៅកន្លែងដែលមានគ្រោះថ្នាក់។
ប្រទេសទាំង៥ បានចាត់ទុកគម្រោងថ្មីនេះថា ជាជំហានដ៏សំខាន់ ប៉ុន្តែភាពស្របច្បាប់ និងប្រសិទ្ធភាពរបស់វានឹងអាស្រ័យលើកិច្ចព្រមព្រៀងចុងក្រោយ ការធានាសិទ្ធិមនុស្ស និងការការពារសុវត្ថិភាពរបស់ជនចំណាកស្រុក៕

