អគ្គីភ័យដ៏ធំមួយបានឆាបឆេះរោងចក្រផលិតបង្អែម Fonusa Agung Mulia នៅស្រុក Serang ខេត្ត Banten ភាគខាងលិចទីក្រុងហ្សាការតា របស់ប្រទេសឥណ្ឌូនេស៊ី កាលពីរសៀលថ្ងៃសៅរ៍ ទី២១ ខែវិច្ឆិកា ដោយបណ្តាលឱ្យមនុស្ស៣នាក់ស្លាប់ និង៣៦នាក់បាត់ខ្លួន ខណៈមនុស្ស ៤ នាក់ផ្សេងទៀតរងរបួស និងត្រូវបានបញ្ជូនទៅមន្ទីរពេទ្យ។
សារព័ត៌មានCNA។
តាមមន្ត្រីជួយសង្គ្រោះ អគ្គិភ័យបានបំផ្លាញផ្នែកធំៗនៃរោងចក្រ បណ្តាលឱ្យដំបូលអគារមួយចំនួនបាក់ស្រុត និងមានផ្សែងហុយឡើងជាបន្តបន្ទាប់។ នៅថ្ងៃអាទិត្យ ទី២២ ខែវិច្ឆិកា ភ្លើងនៅតែបន្តឆេះនៅតាមកន្លែងមួយចំនួនក្នុងរោងចក្រ ដែលធ្វើឱ្យប្រតិបត្តិការស្វែងរកអ្នកបាត់ខ្លួនមានការលំបាក។
អាជ្ញាធរបានឱ្យដឹងថា នៅពេលកើតហេតុ មានមនុស្សប្រហែល ៦០ នាក់កំពុងស្ថិតនៅក្នុងរោងចក្រ។ ក្រុមពន្លត់អគ្គិភ័យបានទទួលដំណឹងនៅម៉ោងប្រហែល ៤:៣០ នាទីរសៀល ប៉ុន្តែនៅពេលទៅដល់ អគារបានឆាបឆេះយ៉ាងខ្លាំងទៅហើយ។
បច្ចុប្បន្ន ក្រុមជួយសង្គ្រោះកំពុងបន្តស្វែងរកជនរងគ្រោះដែលបាត់ខ្លួន ដោយផ្តោតលើសុវត្ថិភាពរបស់មន្ត្រីប្រតិបត្តិការជាចម្បង។ ចំណែកមូលហេតុនៃការឆាបឆេះ កំពុងស្ថិតក្រោមការស៊ើបអង្កេតរបស់អាជ្ញាធរ។
គួរបញ្ជាក់ថា គ្រោះអគ្គិភ័យធ្ងន់ធ្ងរមិនមែនជារឿងកម្រនៅប្រទេសឥណ្ឌូនេស៊ីនោះទេ។ កាលពីខែធ្នូ ឆ្នាំ២០២៥ អគ្គិភ័យនៅអគារកម្ពស់ ៧ ជាន់ក្នុងទីក្រុងហ្សាការតា បានសម្លាប់មនុស្សយ៉ាងហោចណាស់ ២២ នាក់ ខណៈកាលពីឆ្នាំ២០២៣ ការផ្ទុះនៅរោងចក្រកែច្នៃនីកែលមួយកន្លែងនៅភាគខាងកើតប្រទេស ក៏បានសម្លាប់មនុស្សយ៉ាងហោចណាស់ ១៣ នាក់ផងដែរ៕

