អង្គការសហប្រជាជាតិ (UN) បានព្រមានថា ជំនួយមនុស្សធម៌ទៅកាន់តំបន់ហ្គាហ្សា នៅតែយឺតនិងមិនអាចឆ្លើយតបទៅនឹងតម្រូវការរបស់ប្រជាជនប៉ាឡេស្ទីនដែលកំពុងរងទុក្ខដោយភាពអត់ឃ្លាន និងការបំផ្លាញយ៉ាងធ្ងន់ធ្ងរ បើទោះបីជាមានបទឈប់បាញ់ក៏ដោយ។
ប្រភពពីសារព័ត៌មានAl Jazeera នៅថ្ងៃទី 7 ខែវិច្ឆិកា ឆ្នាំ 2025។
តាមការបញ្ជាក់របស់ លោក Farhan Haq អ្នកនាំពាក្យអង្គការសហប្រជាជាតិ អង្គការនិងដៃគូរបស់ខ្លួនបានអាចនាំចូលជំនួយប្រមាណ ៣៧,០០០ តោន ចូលទៅក្នុងហ្គាហ្សា ចាប់តាំងពីមានបទឈប់បាញ់នៅថ្ងៃទី ១០ ខែតុលា ក្នុងនោះភាគច្រើនជាអាហារ ប៉ុន្តែការផ្គត់ផ្គង់នេះនៅមិនគ្រប់គ្រាន់ទេ ដើម្បីជួយប្រជាជនរាប់លាននាក់ដែលត្រូវបានឡោមព័ទ្ធក្នុងតំបន់។
លោក Haq បានអះអាងថា ទោះបីមានវឌ្ឍនភាពខ្លះៗក្នុងការពង្រីកជំនួយក៏ដោយ តែការរឹតត្បិតរបស់អ៊ីស្រាអែលនៅតែជាឧបសគ្គសំខាន់ ដែលធ្វើឱ្យការចូលរបស់ជំនួយមនុស្សធម៌កើតមានយឺតយ៉ាវ។ គាត់បានបន្ថែមថា ការផ្គត់ផ្គង់ទាំងអស់ត្រូវចូលតាមតែច្រកឆ្លងកាត់ពីរប៉ុណ្ណោះ គឺ al-Karara (Kissufim) និង Karem Abu Salem (Kerem Shalom) ខណៈដែលមិនមានការចូលដោយផ្ទាល់ទៅកាន់ភាគខាងជើងនៃហ្គាហ្សា ឬតាមច្រកអេហ្ស៊ីបទៅកាន់ភាគខាងត្បូងឡើយ។
អង្គការសហប្រជាជាតិបានបញ្ជាក់ថា ការរឹតត្បិតនៃច្រកឆ្លងកាត់ទាំងនេះ ក៏ដូចជាការហាមឃាត់បុគ្គលិកអង្គការមិនមែនរដ្ឋាភិបាល (NGO) មិនឱ្យចូលទៅក្នុងតំបន់ បានធ្វើឱ្យការផ្តល់ជំនួយជួបឧបសគ្គយ៉ាងខ្លាំង។
អង្គការសហប្រជាជាតិបានស្នើឱ្យអ៊ីស្រាអែលបន្ធូរបន្ថយការគ្រប់គ្រងលើការផ្គត់ផ្គង់ និងអនុញ្ញាតឱ្យមានការចូលជំនួយដោយសេរីជាងមុន ដើម្បីជួយសង្គ្រោះជីវិតប្រជាជនដែលកំពុងរងទុក្ខ៕