សហជីពនិងក្រុមនិស្សិត នៅប្រទេសបារាំង គ្រោងនឹងចេញមកតាមដងផ្លូវដើម្បីធ្វើការតវ៉ាថ្មីទៀត នៅថ្ងៃសៅរ៍ទី០៧.១១.២០២៦។
ខណៈដែលចលនា«អាវកាក់ពណ៌លឿង» ក៏មានគម្រោងរៀបចំការជួបជុំមួយផ្សេងទៀត នៅកណ្តាលទីក្រុងប៉ារីស ទោះបីជាមានការហាមឃាត់ពីសំណាក់អាជ្ញាធរក៏ដោយ។
សារព័ត៌មានTRT។
ការតវ៉ាទាំងនេះ កើតឡើងបន្ទាប់ពីមានភាពចលាចល ដែលដឹកនាំដោយយុវជន និងការធ្វើកូដកម្មទូទាំងប្រទេសអស់រយៈពេលជាច្រើនសប្តាហ៍ ដែលបានទាក់ទាញកម្មកររាប់សែននាក់ឱ្យចេញមកតាមដងផ្លូវ។
នៅមុនពេលការបោះឆ្នោតជ្រើសរើសអ្នកស្នងតំណែងពីប្រធានាធិបតី Emmanuel Macron ក្នុងរយៈពេលតិចជាង ៦ខែទៀត ខណៈដែលគណបក្សស្តាំនិយមជ្រុល កំពុងនាំមុខនៅក្នុងការស្ទង់មតិ។
ក្រុមនិស្សិត និងសហជីពពាណិជ្ជកម្ម បានរៀបចំការដើរក្បួនមួយដែលទទួលបានការអនុញ្ញាតនៅកណ្តាលទីក្រុងប៉ារីស ដើម្បី«ប្រឆាំងនឹងការឡើងថ្លៃទំនិញ និងដើម្បីគាំទ្រដល់យុវជន»។
សកម្មជននៃចលនា«អាវកាក់ពណ៌លឿង» បានបដិសេធមិនចូលរួមជាមួយក្រុមទាំងនោះទេ។
ប៉ុន្តែផ្ទុយទៅវិញ ពួកគេបានអំពាវនាវឱ្យមានការជួបជុំគ្នានៅទីលាន Place de la Concorde ដែលស្ថិតនៅជិតសភាជាន់ទាប និងវិមានប្រធានាធិបតី ជាកន្លែងដែលអាជ្ញាធរបានហាមឃាត់មិនឱ្យមានការតវ៉ា។
រដ្ឋមន្ត្រីក្រសួងមហាផ្ទៃ លោក Laurent Nunez បានមានប្រសាសន៍ថា មន្ត្រីប៉ូលិស និងបុគ្គលិកសន្តិសុខចំនួន ៧០,០០០នាក់ នឹងត្រូវដាក់ពង្រាយនៅទូទាំងប្រទេស។
លោកបាននិយាយថា៖«ប្រសិនបើមានអ្នកបង្កចលាចល ឬអ្នកលួចប្លន់ យើងនឹងត្រៀមខ្លួនរង់ចាំពួកគេ»។
ការតវ៉ាទាំងនេះភាគច្រើនប្រព្រឹត្តទៅដោយសន្តិវិធី ទោះបីជាមានករណីខ្លះកើតមានការប៉ះទង្គិច និងការបំផ្លិចបំផ្លាញទ្រព្យសម្បត្តិសាធារណៈក៏ដោយ រួមទាំងហេតុការណ៍ កាលពីថ្ងៃទី១៧ ខែតុលា ដែលជាពេលដែលប្រទេសបារាំងបានជួបប្រទះនឹងភាពចលាចលដ៏អាក្រក់បំផុតក្នុងរយៈពេលជាច្រើនឆ្នាំ។
កម្មកររាប់សែននាក់ ដែលធ្វើកូដកម្ម បានដើរក្បួននៅទូទាំងប្រទេស កាលពីថ្ងៃព្រហស្បតិ៍។
ក្នុងលក្ខណៈដែលមានសណ្តាប់ធ្នាប់ល្អ ប៉ុន្តែក៏មានការប៉ះទង្គិចគ្នាកើតឡើងនៅក្នុងទីក្រុងមួយចំនួនផងដែរ។
ចលនា«អាវកាក់ពណ៌លឿង» ដែលបានលេចឡើងកាលពី៨ ឆ្នាំមុន ដើម្បីប្រឆាំងនឹងផែនការដំឡើងពន្ធលើប្រេងឥន្ធនៈ បានជំរុញឱ្យអ្នកគាំទ្ររបស់ខ្លួនចូលរួមក្នុងការជួបជុំដែលត្រូវបានហាមឃាត់នោះ។
លោក Benjamin Ball សមាជិកនៃគណៈកម្មាធិការសម្របសម្រួលនៃចលនានេះ បាននិយាយថា៖«យើងកំពុងអំពាវនាវឱ្យមានការមិនស្តាប់បង្គាប់ទ្រង់ទ្រាយធំ»។
អាជ្ញាធរកំពុងព្យាយាមទប់ស្កាត់កុំឱ្យមានការកើតឡើងវិញនូវភាពចលាចល និងការលួចប្លន់ដូចដែលបានឃើញកាលពីថ្ងៃទី ១៧ ខែតុលា។ ក្រសួងមហាផ្ទៃបានឱ្យដឹងថា ការតវ៉ាកាលពីថ្ងៃព្រហស្បតិ៍«ដំណើរការទៅដោយរលូនជាទូទៅ»ទោះបីជា អង្គការឃ្លាំមើលសេរីភាពសារព័ត៌មាន«អ្នកសារព័ត៌មានគ្មានព្រំដែន» (Reporters Without Borders) បានឱ្យដឹងថា ខ្លួនបានកត់ត្រាករណីចំនួន៤០ ដែលកងកម្លាំងសន្តិសុខបានរារាំងអ្នកសារព័ត៌មានក្នុងពេលកំពុងរាយការណ៍អំពីការតវ៉ា ដោយក្នុងនោះមាន២១ ករណីពាក់ព័ន្ធនឹងអំពើហិង្សាលើរាងកាយ។
រដ្ឋាភិបាលរបស់លោក ម៉ាក្រុង (Macron) កំពុងជួបការលំបាកក្នុងការឆ្លើយតបទៅនឹងការតវ៉ាទាំងនេះ ខណៈដែលអាណត្តិប្រធានាធិបតីរបស់លោកនឹងត្រូវបញ្ចប់នៅខែឧសភា ឆ្នាំ ២០២៧។
លោក សេបាស្ទៀន ឡឺកូណូ (Sebastien Lecornu)គ្រោងនឹងជួបជាមួយសហជីពការងារ និងអង្គការតំណាងនិយោជកនៅថ្ងៃចន្ទ ដើម្បីពិភាក្សាអំពីប្រាក់ឈ្នួល និងអំណាចទិញ។
សម្ព័ន្ធសហជីពមួយបានថ្លែងកាលពីថ្ងៃសុក្រថា៖ «អ្វីតែមួយគត់ដែលអាចបញ្ចប់ការតវ៉ាទាំងនេះបាន គឺការឆ្លើយតបទៅនឹងសំណើដែលត្រូវបានលើកឡើងអស់រយៈពេលជាច្រើនសប្តាហ៍មកហើយ ដោយក្រុមកម្មករ មន្ត្រីរាជការ យុវជន និងអ្នកទទួលប្រាក់សោធននិវត្តន៍»។
ក្រុមសហជីពទាំងនោះកំពុងទាមទារឱ្យមានការដំឡើងប្រាក់ឈ្នួលអប្បបរមា (ដែលមិនត្រូវបានដំឡើងបន្ថែមក្រៅពីការកែសម្រួលតាមលក្ខខណ្ឌចាំបាច់ ចាប់តាំងពីឆ្នាំ២០១២ មក) ការដំឡើងប្រាក់ឈ្នួលទូទៅ ការកែទម្រង់ពន្ធដារ និងលក្ខខណ្ឌសិក្សាល្អប្រសើរជាងមុនសម្រាប់យុវជន។
ប្រទេសបារាំង ដែលជាសេដ្ឋកិច្ចធំជាងគេទីពីរនៅក្នុងសហភាពអឺរ៉ុប កំពុងស្ថិតក្រោមសម្ពាធក្នុងការគ្រប់គ្រងបំណុល ដែលធ្វើឱ្យរដ្ឋាភិបាលមានលទ្ធភាពកំណត់ក្នុងការឆ្លើយតបទៅនឹងសំណើរបស់អ្នកតវ៉ា៕
