កាលពីថ្ងៃទី ៨ ខែវិច្ឆិកា ឆ្នាំ ២០២៥ ប្រធានាធិបតីអ៊ុយក្រែន លោក Volodymyr Zelenskyy បាននិយាយថា រុស្ស៊ីប្រើដ្រូនចំនួនជាង ៤៥០គ្រឿង និងមីស៊ីលចំនួន៤៥គ្រាប់ ទៅលើតំបន់ជាច្រើននៅទូទាំងប្រទេសអ៊ុយក្រែន ដែលបណ្តាលឲ្យមានមនុស្សស្លាប់ និងរងរបួសជាច្រើននាក់។
ប្រភពពីសារព័ត៌មានAnadolu Agency
ក្នុងសារមួយនៅលើបណ្តាញ Telegram លោក Zelenskyy បាននិយាយថា៖ប្រតិបត្តិការជួយសង្គ្រោះកំពុងដំណើរការនៅទីក្រុង Dnipro។ នៅពេលយប់ រុស្ស៊ីបានវាយប្រហារទីក្រុងនេះ ដោយវាបានបុកអគារលំនៅដ្ឋានមួយ។ យោងតាមព័ត៌មាន ចុងក្រោយ មានមនុស្ស ១១ នាក់រងរបួស ហើយ មនុស្សម្នាក់បានស្លាប់។
លោក Zelenskyy បានបន្ថែមថា ជនស៊ីវិលម្នាក់ទៀតត្រូវ បានសម្លាប់នៅក្នុងតំបន់ Kharkiv, ខណៈដែលមាន របាយការណ៍អំពីជនរងគ្រោះជាច្រើនទៀតនៅក្នុងតំបន់ Kyiv និង Poltava។
តាមការបញ្ជាក់របស់ប្រធានាធិបតីអ៊ុយក្រែន ដ្រូនទាំងនេះបានកំណត់គោលដៅទៅលើតំបន់លំនៅ ដ្ឋាន ហេដ្ឋារចនាសម្ព័ន្ធថាមពល និងទីតាំងស៊ីវិលផ្សេងៗទៀត នៅក្នុងតំបន់ Dnipropetrovsk, Kirovohrad, Mykolaiv, Sumy, Chernihiv និង Odesa។
សេវាសង្គ្រោះបន្ទាន់កំពុងអនុវត្តប្រតិបត្តិការជួយសង្គ្រោះ និង ស្តារឡើងវិញនៅតំបន់ដែលរងផលប៉ះពាល់ ដោយក្រុម ជួយសង្គ្រោះកំពុងស្វែងរកមនុស្សដែលនៅតែជាប់នៅក្រោម សំណល់អគារ៕