ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រកាសនៅថ្ងៃទី២៩ ខែតុលា ឆ្នាំ២០២៦ ថា រុស្ស៊ីនឹងបន្តដើរតួនាទីជាប្រទេសផ្គត់ផ្គង់គ្រាប់ធញ្ញជាតិដល់ទ្វីបអាហ្វ្រិក ដោយអាចផ្គត់ផ្គង់តាមរយៈកិច្ចសន្យា ឬផ្តល់ជំនួយដោយឥតគិតថ្លៃ។
សារព័ត៌មានAnadolu Agency។
ការលើកឡើងនេះធ្វើឡើងបន្ទាប់ពីកិច្ចប្រជុំកំពូលរុស្ស៊ី-អាហ្វ្រិកលើកទី៣ នៅទីក្រុងមូស្គូ។ លោក ពូទីន បានបញ្ជាក់ថា រុស្ស៊ីមានបំណងពង្រឹងភាពជាដៃគូយុទ្ធសាស្ត្រជាមួយប្រទេសនៅទ្វីបអាហ្វ្រិក ជាពិសេសលើវិស័យសេដ្ឋកិច្ច ថាមពល និងសន្តិសុខស្បៀង។
លោកក៏បានគាំទ្រឱ្យប្រទេសអាហ្វ្រិកមានតំណាងអចិន្ត្រៃយ៍នៅក្រុមប្រឹក្សាសន្តិសុខអង្គការសហប្រជាជាតិ ដើម្បីបង្កើនតួនាទីរបស់ទ្វីបនេះក្នុងការសម្រេចចិត្តលើបញ្ហាអន្តរជាតិ។
លើវិស័យថាមពល លោក ពូទីន បានឱ្យដឹងថា រុស្ស៊ីកំពុងសហការជាមួយប្រទេសអាហ្វ្រិកក្នុងការអភិវឌ្ឍរោងចក្រថាមពល រួមទាំងថាមពលនុយក្លេអ៊ែរ ហើយត្រៀមខ្លួនសហការលើគម្រោងរោងចក្រថាមពលនុយក្លេអ៊ែរខ្នាតធំ និងខ្នាតតូច។
ជាមួយគ្នានេះ លោក ពូទីន ក៏បាននិយាយអំពីការសន្ទនាតាមទូរស័ព្ទជាមួយមេដឹកនាំហ្វាំងឡង់ និងន័រវែស ដោយបញ្ជាក់ថា រុស្ស៊ីចង់ស្តារទំនាក់ទំនងប្រកបដោយស្ថាបនាជាមួយបណ្តាប្រទេសអឺរ៉ុបឡើងវិញ។ ទោះជាយ៉ាងណា លោកបានព្រមានថា រុស្ស៊ីត្រៀមខ្លួនឆ្លើយតប ប្រសិនបើមានជម្លោះកើតឡើង ប៉ុន្តែមិនចង់បង្កសង្គ្រាមជាមួយអឺរ៉ុបនោះទេ។
លោកក៏បានបញ្ជាក់ថា ប្រសិនបើមានសង្គ្រាមរវាងរុស្ស៊ី និងអឺរ៉ុប នោះនឹងគ្មានភាគីណាទទួលបានជ័យជម្នះឡើយ។
