ប្រទេសហ្វីលីពីន កំពុងប្រឈមមុខនឹងការខូចខាតយ៉ាងធ្ងន់ធ្ងរ បន្ទាប់ពីព្យុះទីហ្វុងហ្វុង-វុង ដែលមានកម្លាំងខ្លាំងក្លា បានបោកបក់ ចូលកោះលូហ្សុន បណ្តាលឲ្យមានទឹកជំនន់ ការរអិលបាក់ដី និងការខូចខាតទ្រព្យសម្បត្តិជាច្រើន។
ប្រភពពីសារព័ត៌មានAl Jazeera នៅថ្ងៃទី 10 ខែវិច្ឆិកា ឆ្នាំ 2025។
តាមការរាយការណ៍ពីអាជ្ញាធរ មនុស្សយ៉ាងហោចណាស់ ២ នាក់បានស្លាប់ ខណៈដែលប្រមាណជា ១.៤ លាននាក់ត្រូវបានជម្លៀសចេញពីផ្ទះរបស់ពួកគេ ដើម្បីស្វែងរកសុវត្ថិភាព។ ការវាយប្រហាររបស់ទីហ្វុងនេះបានបំផ្លាញផ្ទះសម្បែង ផ្លូវថ្នល់ និងបណ្តាញអគ្គិសនីនៅជុំវិញតំបន់ភាគកើតនៃប្រទេស។
ក្រុមជួយសង្គ្រោះរាប់ពាន់នាក់ រួមទាំង ឆ្មាំឆ្នេរសមុទ្រ ប៉ូលីស និងយោធា ត្រូវបានបញ្ជូនទៅតាមតំបន់ដែលរងផលប៉ះពាល់ ដើម្បីជួយអ្នកជម្លៀសចេញ និងសម្អាតកម្ទេចកម្ទី។ ពួកគេបានប្រើឧបករណ៍អគ្គិសនី កាំបិត និងគ្រឿងចក្រធុនធ្ងន់ ដើម្បីបើកផ្លូវ និងយកសម្ភារៈដែលដួលរលំចេញ។
នៅក្នុងទីក្រុងឆ្នេរសមុទ្រភាគខាងកើតនៃ ឌីប៉ាគូឡាវ (Dipaculao) អគ្គិសនីនៅតែដាច់ ហើយក្រុមអ្នកជួយសង្គ្រោះត្រូវបានឃើញកំពុងប្រើពូថៅកាប់ដើមឈើដួល និងដំបូលដែកធំៗ ដើម្បីសម្អាតផ្លូវ។ វីដេអូដែលបានចែករំលែកតាមបណ្តាញសង្គមបង្ហាញភាពស្មុគស្មាញនៃការសង្គ្រោះ និងភាពខិតខំរបស់ប្រជាជនក្នុងការតស៊ូប្រឆាំងនឹងបាតុភូតធម្មជាតិដ៏សាហាវនេះ។
អាជ្ញាធរហ្វីលីពីនបានប្រកាសលុបចោលការរឹតបន្តឹងការធ្វើដំណើរទាំងអស់នៅថ្ងៃចន្ទ ដើម្បីអនុញ្ញាតឲ្យក្រុមជួយសង្គ្រោះ និងអង្គការសប្បុរសធម៌ចូលជួយសង្គ្រោះបានឆាប់រហ័ស។
បើទោះបីជាទីហ្វុងហ្វុង-វុងបានចាកចេញពីប្រទេសហ្វីលីពីនហើយក្តី ការខូចខាតដែលវាបានទុកសល់នៅពីក្រោយនោះ នៅតែជាបញ្ហាធំសម្រាប់ប្រទេសដែលជាញឹកញាប់រងផលប៉ះពាល់ពីភ្លៀងធ្លាក់ខ្លាំង និងព្យុះសមុទ្រ៕