រដ្ឋមន្ត្រីការបរទេសស៊ីរី លោក Asaad al-Shaibani បានថ្លែងកាលពីថ្ងៃសៅរ៍ទី៣១.១០.២០២៦ថា បច្ចុប្បន្នកំពុងពិភាក្សាដើម្បីវាយតម្លៃ លើការចូលរួមរបស់ស៊ីរីក្នុងសម្ព័ន្ធមេកា(Mecca alliance) ដែលជាកិច្ចព្រមព្រៀងថ្នាក់តំបន់មួយរួម មានប្រទេសតួគី ប៉ាគីស្ថាន និងអារ៉ាប៊ីសាអូឌីត។
សារព័ត៌មានAnadolu។
យោងតាមទីភ្នាក់ងារព័ត៌មានអារ៉ាប់ស៊ីរី (SANA) ការលើកឡើងរបស់លោក Shaibani នេះបានធ្វើឡើងក្នុងអំឡុងពេលនៃកិច្ចពិភាក្សាស្តីពីសន្តិសុខ តំបន់ នៅក្នុងព្រឹត្តិការណ៍ Manama Dialogue ឆ្នាំ២០២៦។
លោកបញ្ជាក់ថា ទីក្រុងដាម៉ាស (Damascus) គឺជាផ្នែកដ៏សំខាន់មួយនៃសន្តិសុខតំបន់ ហើយនឹងគាំទ្ររាល់ក្របខ័ណ្ឌទាំងឡាយណា ដែលមានគោលដៅការពារស្ថិរភាពក្នុងតំបន់។
រដ្ឋមន្ត្រីរូបនេះសង្កត់ធ្ងន់ថា តំបន់នេះកំពុងមានតម្រូវការចាំបាច់ខ្លាំងជាងពេលណាៗទាំងអស់ ក្នុងការអភិវឌ្ឍប្រព័ន្ធរួមគ្នាសម្រាប់ការទប់ស្កាត់ និងការការពារ។
ពាក់ព័ន្ធនឹងជម្លោះ នៅក្នុងប្រទេសយេម៉ែន លោក Shaibani បានបញ្ជាក់ជាថ្មីអំពីការគាំទ្ររបស់ស៊ីរី ចំពោះរដ្ឋាភិបាលយេម៉ែន ក្នុងការស្តារអធិបតេយ្យភាព និងស្ថិរភាពនៅទូទាំងប្រទេសនោះ។
លោកក៏បានអំពាវនាវដល់ភាគីទាំងអស់ឱ្យគាំទ្រដល់ឯកភាព និងអធិបតេយ្យភាពរបស់រដ្ឋនានាផងដែរ។
នៅក្នុងបញ្ហាមួយផ្សេងទៀត រដ្ឋមន្ត្រីការបរទេសស៊ីរីបានលើកឡើងថា អ៊ីស្រាអែលបានធ្វើការវាយប្រហារលើប្រទេសរបស់លោកជាង១.០០០ លើក ក្នុងរយៈពេលតិចជាង ២ឆ្នាំ ដែលបណ្តាលឱ្យមនុស្សរាប់សិបនាក់ស្លាប់។
លោកបានថ្លែងថា៖«ទឹកដីរបស់យើងបានរងការវាយប្រហារពីសំណាក់អ៊ីស្រាអែលជាង ១.០០០លើក ក្នុងរយៈពេលជិត២ឆ្នាំ ដែលបណ្តាលឱ្យមនុស្សរាប់សិបនាក់ស្លាប់»។
លោកបានចោទសួរថា៖ «តើការអំពាវនាវឱ្យមានការគ្រប់គ្រងព្រំដែន និងការដាក់ឱ្យអាវុធស្ថិតនៅក្រោមការគ្រប់គ្រងរបស់រដ្ឋតែមួយគត់នោះ អាចចាត់ទុកថាត្រឹមត្រូវដោយរបៀបណា។
ខណៈដែលអធិបតេយ្យភាពរបស់ស៊ីរីកំពុងត្រូវបានរំលោភបំពាន និងក្លាយជាគោលដៅវាយប្រហារជារៀងរាល់ថ្ងៃ?»៕
