សាក្សីបានប្រាប់Anadolu ថា ការវាយប្រហារដោយ(Drone)លើស្ថានីយថាមពលមួយ នៅភាគខាងជើងប្រទេសស៊ូដង់ នៅព្រឹកថ្ងៃអាទិត្យទី០១.១១.២០២៦ ដោយបង្កឱ្យមានអគ្គិភ័យ និងសំឡេងផ្ទុះយ៉ាងខ្លាំង។
តាមសាក្សី ការវាយប្រហារនេះបានកំណត់គោលដៅលើស្ថានីយថាមពល Abu Hamad នៅក្នុងរដ្ឋ River Nile ដែលស្ថិតនៅចម្ងាយប្រហែល ៣៣៤ ម៉ាយល៍ (៥៣៨គីឡូម៉ែត្រ)ភាគខាងជើងនៃរដ្ឋធានី Khartoum។
ពួកគេបាននិយាយថា មានសំឡេងផ្ទុះយ៉ាងខ្លាំងនៅជុំវិញទីតាំងនោះ ខណៈដែលអណ្តាតភ្លើងបានឆាបឆេះផ្នែកខ្លះនៃស្ថានីយថាមពល។
(វីដេអូ)ដែលត្រូវបានចែកចាយដោយសកម្មជននៅលើបណ្តាញសង្គម បានបង្ហាញពីអគ្គិភ័យដ៏ធំមួយនៅឯស្ថានីយថាមពលនោះ។
ការវាយប្រហារចុងក្រោយនេះ បានធ្វើឱ្យចំនួនស្ថានីយថាមពលដែលត្រូវបានកំណត់គោលដៅដោយការវាយប្រហារតាមរយៈយន្តហោះគ្មានមនុស្សបើកនៅទូទាំងរដ្ឋចំនួន ៦ របស់ស៊ូដង់ កើនឡើងដល់ ១២ កន្លែង ចាប់តាំងពីថ្ងៃចន្ទមក។
រដ្ឋដែលរងផលប៉ះពាល់រួមមាន Khartoum, Gezira, Sennar, Gedaref, River Nile និង Red Sea។
មិនទាន់មានការអត្ថាធិប្បាយភ្លាមៗណាមួយពីអាជ្ញាធរស៊ូដង់ជុំវិញការវាយប្រហារនេះ ឬអំពីចំនួនអ្នករងគ្រោះ និងទំហំនៃការខូចខាតនោះទេ។
ហេដ្ឋារចនាសម្ព័ន្ធថាមពលត្រូវបានកំណត់គោលដៅនៅក្នុងការវាយប្រហារជាបន្តបន្ទាប់ដោយយន្តហោះគ្មានមនុស្សបើក
ការវាយប្រហារចុងក្រោយនេះ បានកើតឡើងបន្ទាប់ពីមានការវាយប្រហារមួយផ្សេងទៀតដោយយន្តហោះគ្មានមនុស្សបើកកាលពីថ្ងៃសៅរ៍ ដែលកំណត់គោលដៅលើស្ថានីយថាមពល Hayya នៅក្នុងរដ្ឋ Red Sea ដែលជាទីតាំងមួយកំពុងស្ថិតក្នុងដំណាក់កាលសាងសង់នៅឡើយ។
ការវាយប្រហារលើហេដ្ឋារចនាសម្ព័ន្ធថាមពលទាំងនេះ កើតឡើងចំពេលដែលមានជម្លោះកំពុងបន្តរវាងកងទ័ពស៊ូដង់ និងកងកម្លាំងគាំទ្ររហ័ស (RSF) ដែលជាកងកម្លាំងពាក់កណ្តាលយោធា។
ភាគីទាំងពីរបានប្រយុទ្ធគ្នាអស់រយៈពេលជាច្រើនខែមកហើយ ចាប់តាំងពីខែមេសា ឆ្នាំ ២០២៣ នៅពេលដែលការខ្វែងគំនិតគ្នាជុំវិញការបញ្ចូលកងកម្លាំងយោធារបស់ប្រទេសនេះ បានវិវត្តទៅជាជម្លោះប្រដាប់អាវុធ។
សង្គ្រាមនេះបានសម្លាប់មនុស្សរាប់ម៉ឺននាក់ និងបង្ខំឱ្យប្រជាជនប្រហែល ១៣ លាននាក់ត្រូវភៀសខ្លួនចេញពីលំនៅឋាន ខណៈដែលវិបត្តិមនុស្សធម៌ និងវិបត្តិអត់ឃ្លានកំពុងតែធ្ងន់ធ្ងរឡើងៗ៕
