លោក វ៉ាង យី រដ្ឋមន្ត្រីការបរទេសចិន បាននិយាយថា ចិននឹងបន្តដើរតួនាទីស្ថាបនា ក្នុងការជួយកសាងសន្តិភាពឡើងវិញរវាងថៃនិងកម្ពុជា។
ប្រភពពីសារព័ត៌មានចិន Xinhua។
សារព័ត៌មានចិន Xinhua បានរាយការណ៍ថា លោក Wang Yi ធ្វើការកត់សម្គាល់បែបនេះ នៅក្នុងកិច្ចសន្ទនាតាមទូរស័ព្ទដាច់ដោយឡែកជាមួយឧបនាយករដ្ឋមន្ត្រី និងជារដ្ឋមន្ត្រីការបរទេសកម្ពុជា លោក Prak Sokhonn និងរដ្ឋមន្ត្រីការបរទេសថៃ លោក Sihasak Phuangketkeow កាលពីថ្ងៃព្រហស្បតិ៍ ទី១៨ ខែធ្នូ។
ទាំងកម្ពុជានិងថៃ បានធ្វើការសង្ខេបខ្លីៗប្រាប់លោក Wang អំពីការវិវត្តចុងក្រោយពាក់ព័ន្ធនឹងជម្លោះព្រំដែនកម្ពុជា-ថៃ ហើយបានបង្ហាញពីឆន្ទ:ដើម្បីបន្ធូរបន្ថយភាពតានតឹង និងអនុវត្តបទឈប់បាញ់មួយ។
លោក Wang បានគូសបញ្ជាក់ថា ក្នុងនាមជាមិត្ត និងអ្នកជិតខាងជិតស្និទ្ធរបស់កម្ពុជា និងថៃ ចិនមិនចង់ឃើញភាគីទាំងសងខាងប្រឈមមុខដាក់គ្នាដោយប្រដាប់អាវុធ៕