(ភ្នំពេញ)៖ ទោះបទឈប់បាញ់ បានចូលជាធរមានកាលពីម៉ោង១២ថ្ងៃត្រង់ថ្ងៃទី២៧ ខែធ្នូ ឆ្នាំ២០២៥ក៏ដោយ។
ប៉ុន្ដែអំឡុងពេលនៃការអនុវត្ដបទឈប់បាញ់នេះ យោធាថៃ បានធ្វើសកម្មភាពមួយចំនួន ដូចជាការដាក់ទូកុងតឺន័រ រាយបន្លាលួស ដោតទង់ជាតិ ព្រមទាំងមានការបំផ្លិចបំផ្លាញផ្ទះប្រជាពលរដ្ឋនៅក្នុងទីតាំងមួយចំនួន។
នេះបើតាមការបញ្ជាក់របស់លោក ប៉ែន បូណា អ្នកនាំពាក្យរាជរដ្ឋាភិបាលកម្ពុជា។
អ្នកនាំពាក្យបន្ថែមថា សកម្មភាពដែលភាគីថៃ បានធ្វើខាងលើ គឺជាសកម្មភាពបំពានលើទឹកដីកម្ពុជា បំពានកិច្ចព្រមព្រៀងដែលបានឯកភាពគ្នា និងបំពានធម្មនុញ្ញអង្គការសហប្រជាជាតិជាដើម ហើយរាជរដ្ឋាភិបាលបានធ្វើកំណត់ទូតតវ៉ាយ៉ាងខ្លាំងចំពោះបញ្ហានេះទៅកាន់ភាគីថៃ។
លោកបញ្ជាក់ថា ទោះថៃដាក់ទូកុងតឺន័រ រាយបន្លាលួស ឬដោតទង់ជាតិក៏ដោយ តែមិនមែនបញ្ជាក់ថា ទីនោះជាបន្ទាត់ព្រំដែនរវាងកម្ពុជា-ថៃឡើយ ព្រោះកម្ពុជាមិនទទួលស្គាល់ការកែប្រែខ្សែបន្ទាត់ព្រំដែនណាមួយ ដែលកើតចេញពីការប្រើប្រាស់កម្លាំង៕