ប្រធានតុលាការកំពូល របស់ប្រទេសអ៊ីរ៉ង់ លោក ហ្គោឡាមហូសេន ម៉ូសេនី អេជេអ៊ី (Gholamhossein Mohseni Ejei) នៅ(ថ្ងៃពុធទី៧ ខែមករា) បានព្រមានយ៉ាងម៉ឺងម៉ាត់ថា នឹងមិនមានការលើកលែង ចំពោះអ្នកតវ៉ាណាដែលជួយសត្រូវប្រឆាំង នឹងសាធារណរដ្ឋឥស្លាមឡើយ។
ប្រភពពីប្រព័ន្ធផ្សព្វផ្សាយរដ្ឋ។
ក្នុងនោះលោក អេជេអ៊ី ចោទអ៊ីស្រាអែល និងសហរដ្ឋអាមេរិកថា បានប្រើប្រាស់វិធីសាស្ត្រកូនកាត់ ដើម្បីបង្កអស្ថិរភាពនៅក្នុងប្រទេស។
លោកបានបញ្ជាក់ថា ចាប់ពីពេលនេះតទៅ នឹងមិនមានការលើកលែងចំពោះអ្នកដែលជួយសត្រូវ មិនមានលេសសម្រាប់អ្នកដែលចេញមកតាមផ្លូវដើម្បីបង្កកុបកម្មឡើយ។
ការព្រមាននេះ ធ្វើឡើងខណៈដែលការតវ៉ាប្រឆាំងនឹងវិបត្តិសេដ្ឋកិច្ច និងការធ្លាក់ចុះនៃរូបិយប័ណ្ណបានរីករាលដាលទូទាំងប្រទេស។
យោងតាមក្រុមសិទ្ធិមនុស្ស មនុស្សយ៉ាងហោចណាស់២៧នាក់ស្លាប់ និងជាង ១,៥០០នាក់ត្រូវបានចាប់ខ្លួនក្នុងរយៈពេល ១០ថ្ងៃនេះ។
បាតុកម្មធំបំផុត ក្នុងរយៈពេលបីឆ្នាំចុងក្រោយ ហើយវាកើតឡើងចំពេលដែលប្រធានាធិបតីអាមេរិក លោក ដូណាល់ ត្រាំ បានគំរាមថា នឹងជួយដល់ក្រុមអ្នកតវ៉ា ប្រសិនបើកងកម្លាំងសន្តិសុខ បាញ់ប្រហារលើប្រជាជន៕