សហរដ្ឋអាមេរិក កំពុងធ្វើការដោយស្ងៀមស្ងាត់ ដើម្បីបង្កើតវត្តមានអចិន្ត្រៃយ៍របស់ទីភ្នាក់ងារស៊ើបការណ៍សម្ងាត់កណ្តាល (CIA) នៅក្នុងប្រទេសវេណេស៊ុយអេឡា បន្ទាប់ពីការចាប់ខ្លួនអតីតប្រធានាធិបតី Nicolás Maduro នេះបើយោងតាមប្រភពជាច្រើនដែលស្គាល់ផែនការនេះ។
ប្រភពពីសារព័ត៌មានCNN នៅថ្ងៃទី២៨ខែមករា។
ការពិភាក្សារវាង CIA និងក្រសួងការបរទេសអាមេរិក កំពុងផ្តោតលើរចនាសម្ព័ន្ធវត្តមានរបស់សហរដ្ឋអាមេរិកទាំងរយៈពេលខ្លី និងវែង ក្នុងបរិបទនយោបាយ និងសន្តិសុខដែលមិនស្ថិតស្ថេរបន្ទាប់ពីចាប់ខ្លួនMaduro។ ខណៈក្រសួងការបរទេសនឹងធ្វើជាវត្តមានការទូតផ្លូវការ ក្នុងដំណាក់កាលដំបូង CIA ត្រូវបានគេរំពឹងថានឹងដឹកនាំការចូលមកវិញ ដោយផ្តោតលើសន្តិសុខ ការបង្កើតបណ្តាញទំនាក់ទំនង និងការងារស៊ើបការណ៍សម្ងាត់។
នាយក CIA លោក John Ratcliffe គឺជាមន្ត្រីជាន់ខ្ពស់ដំបូងម្នាក់នៃរដ្ឋបាលលោក Donald Trump ដែលបានទៅទស្សនាប្រទេសវេណេស៊ុយអេឡាបន្ទាប់ពីប្រតិបត្តិការចាប់ខ្លួន Maduro ដោយបានជួបជាមួយថ្នាក់ដឹកនាំបណ្តោះអាសន្ន និងមេដឹកនាំយោធា។ លោកបានបញ្ជាក់ថា វេណេស៊ុយអេឡានឹងមិនត្រូវបានអនុញ្ញាតឱ្យក្លាយជាជម្រកសុវត្ថិភាពសម្រាប់សត្រូវរបស់អាមេរិក ដូចជា ចិន រុស្ស៊ី និងអ៊ីរ៉ង់ ទៀតឡើយ។
ប្រភពក៏បានបង្ហាញថា CIA មានតួនាទីសំខាន់ក្នុងប្រតិបត្តិការចាប់ខ្លួន Maduro ដោយបានដាក់ក្រុមស៊ើបការណ៍សម្ងាត់នៅលើដីជាមុន ដើម្បីតាមដានចលនា និងទីតាំងរបស់លោក។ CIA បានបដិសេធមិនធ្វើអត្ថាធិប្បាយលើព័ត៌មានទាំងនេះ៕