សង្រ្គាមរវាងអាមេរិក-អ៊ីស្រាអែល និងអ៊ីរ៉ង់ បានឈានចូលដល់ថ្ងៃទី៣០ ហើយកាលពីថ្ងៃអាទិត្យ។
ខណៈដែលអ៊ីស្រាអែល និងអ៊ីរ៉ង់ នៅតែបន្តវាយប្រហារដាក់គ្នាទៅវិញទៅមកគ្មានឈប់ឈរ។
វីដេអូថតក្នុងទីក្រុងតេហេរ៉ង់ ប្រទេសអ៊ីរ៉ង់ បានបង្ហាញពីសកម្មភាពប្រព័ន្ធការពារដែនអាកាស កំពុងបាញ់ស្ទាក់វត្ថុមិនស្គាល់អត្តសញ្ញាណនៅលើមេឃ កាលពីយប់ថ្ងៃអាទិត្យ។
យោងតាមសារព័ត៌មានចិន China Media Group (CMG)ប្រចាំនៅទីក្រុងតេហេរ៉ង់ បានឱ្យដឹងថា ប្រព័ន្ធការពារដែនអាកាសក្នុងទីក្រុងនេះ បានដំណើរការជាបន្តបន្ទាប់ ចាប់តាំងពីម៉ោង ៧:៣៧ យប់ (ម៉ោងក្នុងស្រុក) ដើម្បីស្ទាក់គ្រាប់ផ្លោងដែលបាញ់ចូលមក។
សារព័ត៌មាន The Washington Post បានរាយការណ៍កាលពីថ្ងៃសៅរ៍ថា មន្ទីរបញ្ចកោណអាមេរិកកំពុងរៀបចំផែនការវាយប្រហារជើងគោករយៈពេលច្រើនសប្តាហ៍នៅក្នុងប្រទេសអ៊ីរ៉ង់ ខណៈដែលកងទ័ពអាមេរិក និងកងម៉ារីនរាប់ពាន់នាក់ បានធ្វើដំណើរមកដល់មជ្ឈិមបូព៌ាហើយ។
ចំណែកសារព័ត៌មានThe Wall Street Journal ក៏បានរាយការណ៍មុននេះដែរថា មន្ទីរបញ្ចកោណកំពុងពិចារណាបញ្ជូនកងទ័ពជើងគោកបន្ថែមរហូតដល់ ១០,០០០នាក់ ទៅកាន់តំបន់មជ្ឈិមបូព៌ា ដើម្បីផ្តល់ជម្រើសយោធាបន្ថែមដល់លោកប្រធានាធិបតី ដូណាល់ ត្រាំ ក្រៅពីការប្រើប្រាស់មធ្យោបាយការទូត។
ជាការឆ្លើយតបទៅនឹងការគំរាមកំហែងរបស់អាមេរិក លោក Ebrahim Zolfaghari អ្នកនាំពាក្យទីបញ្ជាការកណ្តាលយោធាអ៊ីរ៉ង់ បានថ្លែងក្នុងសេចក្តីថ្លែងការណ៍មួយនៅថ្ងៃអាទិត្យថា កងកម្លាំងប្រដាប់អាវុធអ៊ីរ៉ង់ បានត្រៀមខ្លួនជាស្រេចដើម្បី វាយបកវិញយ៉ាងដាច់អហង្ការ៕