ប្រទេស India បានចាប់ផ្តើមដំណើរការជំរឿនប្រជាជនជាតិធំបំផុតលើពិភពលោក ដោយមានមន្ត្រីជាងបីលាននាក់ចូលរួមក្នុងការរាប់ចំនួនប្រជាជនរយៈពេលមួយឆ្នាំ។ ជំរឿននេះត្រូវបានពន្យារពេលពីមុនដោយសារជំងឺរាតត្បាត COVID-19 ហើយឥឡូវបានចាប់ផ្តើមជាផ្លូវការនៅថ្ងៃទី១ ខែមេសា ឆ្នាំ២០២៦។
ប្រភពពីសារព័ត៌មានAl Jazeera នៅថ្ងៃទី១ខែមេសា។
នៅដំណាក់កាលដំបូង បុគ្គលិកជំរឿននឹងប្រមូលព័ត៌មានអំពីផ្ទះសម្បែង ស្ថានភាពរស់នៅ និងលំនៅដ្ឋានរបស់ប្រជាពលរដ្ឋ ដែលនឹងចំណាយពេលប្រហែលមួយខែ។ ទិន្នន័យនឹងត្រូវប្រមូលតាមការស្ទង់មតិផ្ទាល់ និងតាមប្រព័ន្ធអ៊ីនធឺណិត ដោយប្រើកម្មវិធីស្មាតហ្វូនផងដែរ។
ដំណាក់កាលទីពីរនៃជំរឿននឹងចាប់ផ្តើមនៅខែកញ្ញា ដោយប្រមូលព័ត៌មានបន្ថែមអំពីលក្ខណៈសង្គម និងសេដ្ឋកិច្ចរបស់ប្រជាជន រួមមានសាសនា និងវណ្ណៈ។ លទ្ធផលនៃជំរឿននេះត្រូវបានរំពឹងថានឹងមានឥទ្ធិពលលើគោលនយោបាយសុខុមាលភាព និងការតំណាងនយោបាយនៅទូទាំងប្រទេស៕