(កំពង់ឆ្នាំង)៖ ក្រោយមានការចែករំលែកយ៉ាងផុសផុល នៅលើបណ្តាញសង្គម ពាក់ព័ន្ធវីដេអូ ដែលមន្ត្រីនគរបាលម្នាក់ ថ្លែងទៅកាន់សិស្សរៀនភាសាកូរ៉េ នៅស្រុកទឹកផុស ខេត្តកំពង់ឆ្នាំង។
ដោយមានខ្លឹមសារមួយចំនួនត្រូវបានមហាជនចាត់ទុកថា មិនសមរម្យជាមន្ត្រីអនុវត្តច្បាប់។
ស្នងការដ្ឋាននគរបាលខេត្តកំពង់ឆ្នាំង បានចេញសេចក្តីបំភ្លឺជាផ្លូវការ ដើម្បីបកស្រាយជុំវិញករណីនេះ។
យោងតាមសេចក្តីបំភ្លឺ មន្ត្រីនគរបាលដែលចុះផ្សព្វផ្សាយគោលនយោបាយ «ភូមិ-ឃុំ-សង្កាត់មានសុវត្ថិភាព» មានបំណងអប់រំ និងក្រើនរំលឹកពលរដ្ឋឱ្យប្រុងប្រយ័ត្នចំពោះការញុះញង់ និងព័ត៌មានបោកប្រាស់ផ្សេងៗ។ ទោះជាយ៉ាងណា ភាសា និងការប្រើពាក្យសម្តីមួយចំនួនក្នុងពេលនោះ បានបង្កឱ្យមានការយល់ច្រឡំ និងប៉ះពាល់ដល់កិត្តិយស ក៏ដូចជាវិជ្ជាជីវៈរបស់កងកម្លាំងនគរបាលជាតិ។
ជាការកត់សម្គាល់ ករណីនេះបានបង្ហាញឱ្យឃើញថា ក្នុងយុគសម័យបណ្តាញសង្គម មន្ត្រីសាធារណៈគ្រប់រូប ត្រូវមានការប្រុងប្រយ័ត្នខ្ពស់ចំពោះការប្រើប្រាស់ពាក្យសម្តីជាសាធារណៈ ព្រោះសម្តីមួយឃ្លា អាចជះឥទ្ធិពលដល់ទំនុកចិត្តរបស់ប្រជាពលរដ្ឋចំពោះស្ថាប័នទាំងមូល។
គួរឱ្យកោតសរសើរផងដែរ ដែលស្នងការដ្ឋាននគរបាលខេត្តកំពង់ឆ្នាំង មិនបានគេចវេះពីការរិះគន់របស់សាធារណជនទេ ប៉ុន្តែបានចេញមុខបំភ្លឺ និងអប់រំ ណែនាំមន្ត្រីពាក់ព័ន្ធភ្លាមៗ។ នេះជាសញ្ញាបង្ហាញពីការទទួលខុសត្រូវ និងការបើកចំហចំពោះមតិសាធារណៈ។
មហាជនជាច្រើនយល់ថា ការរិៈគន់ក្នុងន័យស្ថាបនា មិនមែនដើម្បីវាយប្រហារស្ថាប័នណាមួយឡើយ។
ប៉ុន្តែ ជាការពង្រឹងគុណភាពសេវាសាធារណៈ និងលើកកម្ពស់ស្តង់ដារវិជ្ជាជីវៈរបស់មន្ត្រីរាជការ៕
