ប្រធានាធិបតីអាមេរិក លោក Donald Trump បានព្រមានអ៊ីរ៉ង់ថា លោកត្រៀមខ្លួនរួចជាស្រេច ដើម្បីបន្តការវាយប្រហារ ប្រសិនបើទីក្រុងតេអេរ៉ង់ មិនគោរពតាមកាតព្វកិច្ចរបស់ខ្លួន មុនពេលចុះហត្ថលេខា លើកិច្ចព្រមព្រៀងដើម្បីបញ្ចប់សង្គ្រាម រវាងប្រទេសទាំងពីរ។
សារព័ត៌មានTRT។
លោក Trump បានថ្លែងបែបនេះ នៅក្នុងកិច្ចប្រជុំG7 នាថ្ងៃពុធទី១៧.០៦.២០២៦។
ដោយសំដៅទៅលើកិច្ចព្រមព្រៀងដែលរំពឹងថា នឹងចុះហត្ថលេខានៅប្រទេសស្វីស នៅថ្ងៃសុក្រនេះ។
លោក Trump អះអាងថា”ទេវាមិនមែនជាចុងក្រោយទេ វាជាអនុស្សរណៈនៃការយោគយល់គ្នា”។
លោកបន្ថែមថា “ប្រសិនបើខ្ញុំមិនចូលចិត្តវាទេ យើងនឹងត្រលប់ទៅបាញ់ប្រហារពួកគេវិញ”។
“ប្រសិនបើពួកគេមិនប្រព្រឹត្តទេ យើងនឹងត្រលប់ទៅទម្លាក់គ្រាប់បែក ចំកណ្តាលក្បាលរបស់ពួកគេវិញ”។
«ដោយសារតែពួកគេមានអាកប្បកិរិយាមិនល្អអស់រយៈពេល៤៧ឆ្នាំ» លោកបាននិយាយ ដោយសំដៅទៅលើរដ្ឋាភិបាលនៅទីក្រុងតេអេរ៉ង់បន្ទាប់ពីបដិវត្តន៍អ៊ីរ៉ង់ បន្ទាប់ពីការបណ្តេញស្តេចសាហ៍ ដែលជាសម្ព័ន្ធមិត្តរបស់សហរដ្ឋអាមេរិកក្នុងឆ្នាំ១៩៧៩។
ទីក្រុងវ៉ាស៊ីនតោន និងទីក្រុងតេអេរ៉ង់ បានឈានដល់បទឈប់បាញ់បណ្តោះអាសន្ន នៅខែមេសានេះ តាមរយៈការសម្របសម្រួលរបស់ប៉ាគីស្ថាន មុនពេលប្រកាសកិច្ចព្រមព្រៀងក្របខ័ណ្ឌនៅថ្ងៃចន្ទនេះ ដើម្បីបញ្ចប់ជម្លោះ។
លោក Trump ក៏បាននិយាយផងដែរថា គោលបំណងស្នូលនៃកិច្ចព្រមព្រៀងនេះគឺដើម្បីការពារទីក្រុងតេអេរ៉ង់ពីការទទួលបានអាវុធនុយក្លេអ៊ែរ៕
