ហេសបូឡាហ៍បាននិយាយនៅថ្ងៃសុក្រទី១៩.០៦.២០២៦ថា យុទ្ធជនរបស់ខ្លួនបានបំផ្លាញរថក្រោះ«អ៊ីស្រាអែល» ចំនួនបីគ្រឿង ហើយការប៉ះទង្គិចគ្នានៅតែបន្ត។
បន្ទាប់ពីប្រព័ន្ធផ្សព្វផ្សាយរដ្ឋលីបង់ បានរាយការណ៍ថា ការវាយប្រហារ «អ៊ីស្រាអែល»នៅភាគខាងត្បូងបានសម្លាប់មនុស្ស៣នាក់។
សារព័ត៌មានRoya news។
ការប្រយុទ្ធគ្នា បានកើតឡើងមួយថ្ងៃបន្ទាប់ពីសហរដ្ឋអាមេរិក និងអ៊ីរ៉ង់បានចុះហត្ថលេខា លើកិច្ចព្រមព្រៀងមួយដើម្បីបញ្ចប់សង្គ្រាមមជ្ឈិមបូព៌ា នៅគ្រប់ទិសទី រួមទាំងនៅលីបង់ផងដែរ។
ហេសបូឡាហ៍ ដែលជាក្រុមគាំទ្រដោយអ៊ីរ៉ង់ បាននិយាយកាលពីថ្ងៃសុក្រថា យុទ្ធជនរបស់ខ្លួនបានកំណត់គោលដៅ«រថក្រោះ Merkava ចំនួនបីគ្រឿងជាមួយនឹងមីស៊ីលដឹកនាំ ដែលនាំទៅដល់ការបំផ្លាញ និងដុតបំផ្លាញពួកវា»។
នេះគឺបន្ទាប់ពីកងកម្លាំង«អ៊ីស្រាអែល» «ដែលមានកងអនុសេនាធំពាសដែក និងកងអនុសេនាធំថ្មើរជើង(បានព្យាយាម) ជ្រៀតចូលឆ្ពោះទៅផ្នែកខាងជើងនៃភ្នំ Ali al-Taher» ទីតាំងយុទ្ធសាស្ត្រមួយដែលមើលរំលងទីក្រុងសំខាន់ Nabatieh។
ហេសបូឡាហ៍បាននិយាយនៅក្នុងសេចក្តីថ្លែងការណ៍ដែលចេញផ្សាយនៅព្រឹកព្រលឹមថា«ការប៉ះទង្គិចគ្នានៅតែបន្ត»។
ក្រុមហេសបូឡា បានទាញប្រទេសលីបង់ចូលទៅក្នុងសង្គ្រាមមជ្ឈិមបូព៌ាកាលពីខែមីនា ដោយវាយប្រហារទៅលើ«អ៊ីស្រាអែល» ដើម្បីសងសឹកចំពោះការសម្លាប់មេដឹកនាំកំពូលរបស់អ៊ីរ៉ង់នៅពេលចាប់ផ្តើមយុទ្ធនាការរវាងសហរដ្ឋអាមេរិក និង«អ៊ីស្រាអែល»។
«អ៊ីស្រាអែល» បានសងសឹកដោយការវាយប្រហារយ៉ាងទូលំទូលាយនៅទូទាំងប្រទេសលីបង់ និងដោយបើកការឈ្លានពានលើដីគោកនៅភាគខាងត្បូង ដែលមានព្រំប្រទល់ជាប់នឹង«អ៊ីស្រាអែល»និងស្ថិតនៅក្រោមឥទ្ធិពលរបស់ហេសបូឡាជាយូរមកហើយ៕
