ប្រធានាធិបតីអ៊ុយក្រែន លោកVolodymyr Zelenskyy បានព្រមានថារុស្ស៊ីកំពុងត្រៀមបើកការវាយប្រហារទ្រង់ទ្រាយធំមួយក្នុងរយៈពេលប៉ុន្មានថ្ងៃខាងមុខ ហើយបានអំពាវនាវឱ្យប្រជាពលរដ្ឋយកចិត្តទុកដាក់ចំពោះសញ្ញាព្រមានការវាយប្រហារតាមអាកាស។
ប្រភពពីសារព័ត៌មានTRT World នៅថ្ងៃទី២១ខែមិថុនា។
ក្នុងសុន្ទរកថានៅថ្ងៃទី២១ ខែមិថុនា លោក Zelenskyy បានអះអាងថា កងកម្លាំងរុស្ស៊ីបន្តវាយប្រហារលើតំបន់នានានៃអ៊ុយក្រែន ខណៈដែលអ៊ុយក្រែនក៏បានបើកការវាយប្រហារលើរោងចក្រចម្រាញ់ប្រេងមួយនៅតំបន់ Tyumen Oblast របស់រុស្ស៊ីផងដែរ។
លោក Zelenskyy ក៏បានចោទប្រកាន់ Belarus ថាកំពុងជួយរុស្ស៊ី ដោយអនុញ្ញាតឱ្យមានឧបករណ៍បញ្ជូនសញ្ញានៅជិតព្រំដែន ដែលត្រូវបានប្រើសម្រាប់គាំទ្រការវាយប្រហារដោយដ្រូនលើអ៊ុយក្រែន។ លោកបានព្រមានថា ប្រសិនបើឧបករណ៍ទាំងនោះមិនត្រូវបានដកចេញទេ អ៊ុយក្រែនអាចចាត់វិធានការដោយខ្លួនឯង៕
