ប្រធានាធិបតីអ៊ីរ៉ង់ លោក Masoud Pezeshkian បាននិយាយថា ទ្រព្យសម្បត្តិ ដែលត្រូវបានបង្កកទុកចំនួន ៦ពាន់លានដុល្លារ នៅក្នុងប្រទេសកាតា នឹងត្រូវប្រគល់ជូនទីក្រុងតេអេរ៉ង់វិញ ជាផ្នែកមួយនៃកិច្ចព្រមព្រៀងបឋមរវាងអ៊ីរ៉ង់ និងសហរដ្ឋអាមេរិក។
សារព័ត៌មានTRT។
លោក Pezeshkian បាននិយាយនៅក្នុងសេចក្តីថ្លែងការណ៍ នៅថ្ងៃអាទិត្យទី២១.០៦.២០២៦ថា”ការចរចា ដែលចាប់ផ្ដើមនៅថ្ងៃនេះ ពោលគឺទ្រព្យសម្បត្តិចំនួន ៦ពាន់លានដុល្លារដែលយើងមាននៅក្នុងប្រទេសកាតា ក៏នឹងត្រូវបានដោះលែង ហើយប្រគល់ជូនប្រទេសរបស់យើងវិញផងដែរ”។
លោក បានបន្ថែមថា”អ្វីដែលប្រាកដនោះគឺថា យើងនឹងមិនបោះបង់ចោលសិទ្ធិរបស់យើងក្នុងការបង្កើនសារធាតុអ៊ុយរ៉ាញ៉ូមឡើយ ហើយភាគីម្ខាងទៀតនឹងត្រូវបង្ខំចិត្តទទួលយកវា”។
ដោយលើកឡើងពីការព្រួយបារម្ភរបស់ទីក្រុងវ៉ាស៊ីនតោនលើកម្មវិធីនុយក្លេអ៊ែររបស់អ៊ីរ៉ង់ លោក Pezeshkian បាននិយាយថា អ៊ីរ៉ង់ “មិនមានបំណង” ក្នុងការអភិវឌ្ឍអាវុធនុយក្លេអ៊ែរទេ។
ប្រធានាធិបតីអ៊ីរ៉ង់បានសង្កត់ធ្ងន់ថា “នេះមិនមែនជាបញ្ហាថ្មីទេ ហើយវាត្រូវបានលើកឡើងដោយមេដឹកនាំបដិវត្តន៍អ៊ីស្លាមដែលត្រូវបានសម្លាប់ក្នុងរយៈពេលជាច្រើនឆ្នាំកន្លងមកនេះ”។
គណៈប្រតិភូសហរដ្ឋអាមេរិក និងអ៊ីរ៉ង់បានមកដល់មុនម៉ោងកំណត់នៅប្រទេសស្វីស សម្រាប់ការចរចាបច្ចេកទេសក្រោមអនុស្សរណៈនៃការយោគយល់គ្នាដែលបានចុះហត្ថលេខាកាលពីថ្ងៃពុធ ដើម្បីបញ្ចប់ជម្លោះមជ្ឈិមបូព៌ារយៈពេលជាច្រើនខែ និងបើកច្រកសមុទ្រហ័រមូសឡើងវិញ។
ការចរចានៅ Burgenstock ត្រូវបានដឹកនាំដោយអនុប្រធានាធិបតីសហរដ្ឋអាមេរិក JD Vance និងប្រធានសភា Mohammad Bagher Ghalibaf និងរដ្ឋមន្ត្រីការបរទេស Abbas Araghchi នៅខាងអ៊ីរ៉ង់ ក្រោមការសម្របសម្រួលរបស់ប៉ាគីស្ថាន៕
