គិតត្រឹមព្រឹកថ្ងៃទី២៦.០៦.២០២៦(ម៉ោងនៅកម្ពុជា)ចំនួនអ្នកស្លាប់ដោយសាររញ្ជួយដីនៅវេណេស៊ុយអេឡា បានកើនដល់២៣៥នាក់ និងរបួសជាង៤.៣០០នាក់។
សារព័ត៌មានAP។
រដ្ឋមន្ត្រីក្រសួងសុខាភិបាល របស់វេណេស៊ុយអេឡា លោក Carlos Alvarado បាននិយាយថា គ្រោះរញ្ជួយដីកម្រិត៧.២រ៉ិចទ័រ និងកម្រិត៧.៥រ៉ិចទ័រ ដែលបានវាយប្រហារប្រទេសវេណេស៊ុយអេឡា កាលពីល្ងាចថ្ងៃពុធទី២៤.០៦.២០២៦(ម៉ោងនៅក្នុងតំបន់)ត្រូវនិងព្រឹកថ្ងៃទី២៥.០៦.២០២៦(ម៉ោងនៅកម្ពុជា)។
បណ្ដាលឱ្យអគារជាច្រើនត្រូវដួលរលំសង្កត់មនុស្សស្លាប់ និងបាត់ខ្លួនរាប់សិបនាក់..!។
ហើយបើគិតមកដល់ព្រឹកថ្ងៃទី២៦.០៦.២០២៦(ម៉ោងនៅកម្ពុជា) ក្រុមសង្គ្រោះបានរកឃើញអ្នកស្លាប់ចំនួន២៣៥នាក់ និងរបួសជាង៤.៣០០នាក់។
*ប្រទេសជាច្រើននៅលើពិភពលោក សុទ្ធតែប្រកាសបញ្ជូនក្រុមស្វែងរក និងជួយសង្គ្រោះទៅកាន់វ៉េណេស៊ុយអេឡា។
ក្នុងនោះប្រទេសម៉ិកស៊ិក លោកស្រី Claudia Sheinbaum ក៏បានប្រកាសពីការផ្តល់ជំនួយ ជាក្រុមអ្នកជួយសង្គ្រោះ និងបុគ្គលិកសុខាភិបាលផងដែរ។
ប្រទេសកូឡុំប៊ី អភិបាលក្រុង Bogotá លោក Carlos Galán និយាយថា លោកកំពុងបញ្ជូនក្រុមស្វែងរក និងជួយសង្គ្រោះជំនាញ ពីនាយកដ្ឋានពន្លត់អគ្គិភ័យនៃទីក្រុងរបស់លោក រួមជាមួយ Dastan ដែលជាសត្វសុនខហិតក្លិន ទទួលបានការបណ្តុះបណ្តាល ក្នុងការស្វែងរកមនុស្សជាប់ក្រោមគំនរអគារ។
បុរីវ៉ាទីកង់ បានឲ្យដឹងថា សម្តេចប៉ាប Leo បានផ្ញើកញ្ចប់ជំនួយបន្ទាន់ដំបូង មានទឹកប្រាក់ ១០០.០០០អឺរ៉ូ ឬ៨៦.២០០ផោន ហើយត្រៀមជួយបន្ថែមទៀត ជាបន្តបន្ទាប់។
ស្ថាប័នអន្តរជាតិមួយចំនួន ក៏ចូលរួមផងដែរ ដោយក្នុងនោះ ប្រមុខអង្គការសុខភាពពិភពលោក (WHO) លោក Tedros Adhanom Ghebreyesus បញ្ជាក់ថា ក្រុមការងារ WHO កំពុងទាក់ទងយ៉ាងជិតស្និទ្ធ ជាមួយក្រុមឆ្លើយតបគ្រោះមហន្តរាយ និងត្រៀមលក្ខណៈជាស្រេច ក្នុងការបញ្ជូនបុគ្គលិកបន្ថែម ព្រមទាំងការផ្គត់ផ្គង់វេជ្ជសាស្ត្រនានា។
សហរដ្ឋអាមេរិក ប្រកាសបញ្ជូនក្រុមឆ្លើយតបបន្ទាន់ ទៅវ៉េណេស៊ុយអេឡា ដែរ ដោយផ្ដោតសំខាន់លើការស្វែងរក និងការចូលទៅជួយសង្គ្រោះ អ្នកដែលនៅរស់រានមានជីវិត។
ទីក្រុងវ៉ាស៊ីនតោន កំពុងកៀរគរថវិកាចំនួន ១៥០លានដុល្លារ ដើម្បីជួយដល់វ៉េណេស៊ុយអេឡា តាមរយៈដៃគូនានារបស់ខ្លួន រួមមានអង្គការកងពលវេជ្ជសាស្ត្រអន្តរជាតិ (International Medical Corps) និងកម្មវិធីស្បៀងអាហារពិភពលោក (WFP) ព្រមទាំងការចូលរួមចំណែកថវិកាចំនួន ១០០ លានដុល្លារ ទៅក្នុងមូលនិធិរួម របស់ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) ប្រចាំប្រទេស វ៉េណេស៊ុយអេឡា៕
