(ភ្នំពេញ)៖ បន្ទាប់ពីល្បីពេញបណ្ដាញសង្គម ជុំវិញករណីមន្ត្រីសណ្ដាប់ធ្នាប់ខណ្ឌទួលគោក“មិនឱ្យរថយន្តដឹកផ្លែទុរេនចូលផ្ទះអាជីវករ”។
ឥឡូវ វិវាទមួយនេះ ត្រូវបានដោះស្រាយបញ្ចប់ ក្រោមការសម្របសម្រួលពីលោក ជា ពិសី អភិបាលខណ្ឌទួលគោក.!។
*នេះបើយោងតាម លិខិតកំណត់ហេតុ របស់រដ្ឋបាលខណ្ឌទួលគោក ចុះថ្ងៃទី០៥.០៧.២០២៦។
ទាក់ទិនរឿងនេះ នៅរសៀលថ្ងៃទី០៥.០៧.២០២៦ លោក ជា ពិសី អភិបាលខណ្ឌទួលគោក បានអញ្ជើញក្រុមគ្រួសារម្ចាស់ផ្ទះលេខ៣ ផ្លូវលេខ២៧២ សង្កាត់ផ្សារដើមគរ ខណ្ឌទួលគោក ជាម្ចាស់អាជីវកម្មលក់ផ្លែឈើ ដែលមានយីហោ ឈ្មោះ ស្រីអូនលក់ផ្លែឈើ មកជួបពិភាក្សាសម្រប សម្រួលពីបញ្ជាការបង្ហោះតាមបណ្តាញសង្គម អំពីការរៀបចំសណ្តាប់ធ្នាប់នៅផ្លូវលេខ២៧២ សង្កាត់ផ្សារដើមគរ ខណ្ឌ ទួលគោក កាលពីថ្ងៃទី៤ ខែកក្កដា ឆ្នាំ២០២៦ នៅបន្ទប់លោកអភិបាលខណ្ឌផ្ទាល់។
ក្រោយពីបានជជែកពិភាក្សាគ្នា រួចមក បងប្អូនអាជីវករទាំងអស់ បានឯកភាពទទួលយកការណែនាំពី លោកអភិបាលខណ្ឌ អំពីការចូលរួមរៀបចំសណ្តាប់ធ្នាប់តាមដងផ្លូវមុខផ្ទះឱ្យបានល្អ និងថែរក្សាអនាម័យ បរិស្ថានឱ្យបានស្អាតជាប្រចាំ និងយល់ព្រមលុបនូវព័ត៌មាន ដែលបានបង្ហោះចេញពីបណ្តាញសង្គមចាប់ពីពេលនេះតទៅ។
ហើយលោកអភិបាលខណ្ឌ ក៏បានទទួលសំណូមពររបស់អាជីវករ អំពីសកម្មភាពមិនសមរម្យរបស់បុគ្គលប្រជាការពារមួយចំនួនតូច ដើម្បីធ្វើការអប់រំ ណែនាំ និងកែសម្រួលនូវការខុសឆ្គង ទាំងកាយវិការ និងពាក្យសំដីចំពោះប្រជាពលរដ្ឋ ពេលចុះអនុវត្តការងារតទៅថ្ងៃមុខ។
ក្រោយពីជជែកយល់ចិត្តគ្នា រវាង ថ្នាក់ដឹកនាំខណ្ឌ និងអាជីវករប្រកបដោយភាពស្និតស្នាលរួចមក ក៏បាន ត្រលប់ទៅគេហដ្ឋានវិញដោយភាពសប្បាយរីករាយ នឹងដំណោះស្រាយរបស់លោកអភិបាលខណ្ឌ៕
