អាជ្ញាធរស្រីលង្កា បានប្រកាសកាលពីថ្ងៃសុក្រទី០៧.០៨.២០២៦ថា ករណីកុប្បកម្មចំនួន ២ករណី នៅក្នុងពន្ធនាគារ បណ្តាលឱ្យអ្នកទោស ៣នាក់បាត់បង់ជីវិត និង២៣នាក់ទៀតរងរបួស។
ភាពវឹកវរដែលកំពុងរីករាលដាលទូទាំងប្រព័ន្ធពន្ធនាគារស្រីលង្កា កំពុងប្រឈមនឹងបញ្ហាចង្អៀតណែនយ៉ាងធ្ងន់ធ្ងរ។
សារព័ត៌មាន Reuters។
រដ្ឋមន្ត្រីសន្តិសុខសាធារណៈ លោក អានាន់ដា វីជេប៉ាឡា បញ្ជាក់ថាកុប្បកម្មទីមួយនៅពន្ធនាគារNew Magazine ក្នុងទីក្រុងកូឡុំបូ(Colombo) បានសម្លាប់អ្នកទោសម្នាក់និងរបួស ១០នាក់។
កុប្បកម្មទី២នៅពន្ធនាគារ Kuruwita បានសម្លាប់អ្នកទោស២នាក់ និងរបួស ១៤នាក់។
ទន្ទឹមនឹងនេះ ក៏មានភាពវឹកវរមួយទៀតនៅពន្ធនាគារទីក្រុង Negombo ផងដែរ ប៉ុន្តែត្រូវបានប៉ូលិសប្រើហ្គាសបង្ហូរទឹកភ្នែកបំបែកហ្វូងតវ៉ា។
កម្លាំងពិសេសបានគ្រប់គ្រងស្ថានការណ៍បានទាំងស្រុងហើយ ខណៈលោករដ្ឋមន្ត្រីសង្ស័យថា ព្រឹត្តិការណ៍ផ្ទួនៗគ្នានេះអាចមានការរៀបចំទុកជាមុន។
កាលពីដើមខែកក្កដា ការប៉ះទង្គិចគ្នានៅពន្ធនាគារក្នុងទីក្រុង Negombo នេះ ក៏ធ្លាប់បានសម្លាប់មន្ត្រីពន្ធនាគារ ១០នាក់ និងអ្នកទោស២០នាក់រួចមកហើយ៕
