គុយវ៉ែត រងការវាយប្រហារដោយដ្រូន ខណៈអាមេរិកនិងអ៊ីរ៉ង់បន្តវាយប្រហារគ្នាទៅវិញទៅមក!

ប្រទេសគុយវ៉ែតបានប្រកាសថា កំពុងរងការវាយប្រហារដោយដ្រូន ខណៈភាពតានតឹងរវាងសហរដ្ឋអាមេរិក និងអ៊ីរ៉ង់កាន់តែខ្លាំងឡើង ដោយប្រទេសទាំងពីរបានបន្តវាយប្រហារគ្នាទៅវិញទៅមក នៅតំបន់ឈូងសមុទ្រ។
សារព័ត៌មានAl Jazeera។

កាលពីថ្ងៃទី១៧ ខែវិច្ឆិកា កងទ័ពគុយវ៉ែតបានឱ្យដឹងថា សំឡេងផ្ទុះដែលប្រជាជនបានឮ គឺបណ្តាលមកពីប្រព័ន្ធការពារដែនអាកាសកំពុងស្ទាក់ចាប់ការវាយប្រហាររបស់សត្រូវ។
មុននេះ អ៊ីរ៉ង់បានអះអាងថា ខ្លួនបានប្រើដ្រូនវាយប្រហារប្រព័ន្ធរ៉ាដារបស់អាមេរិក នៅមូលដ្ឋានទ័ពអាកាស Sheikh Isa ក្នុងប្រទេសបារ៉ែន ដើម្បីជាការសងសឹកចំពោះការរំលោភដែនអាកាសអ៊ីរ៉ង់ដោយដ្រូនយោធាអាមេរិក។ ចំណែកអាមេរិកបានឆ្លើយតបដោយវាយប្រហារទីតាំងបាញ់មីស៊ីលមួយកន្លែងនៅកោះ Qeshm ភាគខាងត្បូងប្រទេសអ៊ីរ៉ង់។
ទោះជាយ៉ាងណា ភាគីអាមេរិក និងបារ៉ែនបានអះអាងថា ប្រព័ន្ធការពារដែនអាកាសរបស់ខ្លួនបានស្ទាក់ចាប់ដ្រូនទាំងនោះ ដោយមិនបណ្តាលឱ្យមានការខូចខាតដល់សម្ភារយោធា ឬបុគ្គលិកអាមេរិកឡើយ។ ចំណែកអ៊ីរ៉ង់បានបញ្ជាក់ថា ការវាយប្រហាររបស់អាមេរិកនៅកោះ Qeshm មិនបង្កការខូចខាតដល់លំនៅឋាន និងហេដ្ឋារចនាសម្ព័ន្ធស៊ីវិលទេ។
ស្ថានការណ៍នេះបានបង្ហាញពីការកើនឡើងនៃភាពតានតឹងនៅតំបន់មជ្ឈិមបូព៌ា ខណៈកិច្ចព្រមព្រៀងសន្តិភាពរវាងភាគីពាក់ព័ន្ធនៅមិនទាន់អាចសម្រេចបាននៅឡើយ៕

Leave a Reply

Your email address will not be published. Required fields are marked *