មូលនិធិ Hind Rajab ជំរុញឱ្យអាមេរិកចាត់វិធានការផ្លូវច្បាប់លើអតីតរដ្ឋមន្ត្រីការពារជាតិអ៊ីស្រាអែល!

មូលនិធិ Hind Rajab បានដាក់សំណើទៅក្រសួងយុត្តិធម៌សហរដ្ឋអាមេរិក កាលពីថ្ងៃទី១៧ ខែវិច្ឆិកា ដើម្បីស្នើឱ្យមានការស៊ើបអង្កេត និងចាត់វិធានការផ្លូវច្បាប់លើលោក Yoav Gallant អតីតរដ្ឋមន្ត្រីការពារជាតិអ៊ីស្រាអែល ពីបទចោទប្រកាន់ពាក់ព័ន្ធនឹងឧក្រិដ្ឋកម្មសង្គ្រាមនៅតំបន់ហ្គាហ្សា និងប្រទេសលីបង់ ព្រមទាំងអំពើប្រល័យពូជសាសន៍នៅប៉ាឡេស្ទីន។
សារព័ត៌មានAnadolu Agency។

សំណើនេះត្រូវបានដាក់ឡើងមុនពេលលោក Gallant គ្រោងធ្វើដំណើរទៅទីក្រុងញូវយ៉ក នៅថ្ងៃទី១៨ ខែវិច្ឆិកា ដើម្បីថ្លែងសុន្ទរកថាក្នុងកិច្ចប្រជុំប្រចាំឆ្នាំរបស់វិទ្យាស្ថាន MirYam។
មូលនិធិបានចោទប្រកាន់ថា លោក Gallant មានការទទួលខុសត្រូវចំពោះគោលនយោបាយយោធារបស់អ៊ីស្រាអែល ដែលបណ្តាលឱ្យមានការស្លាប់ជនស៊ីវិល ការបំផ្លិចបំផ្លាញលំនៅឋាន ការបង្ខំប្រជាជនឱ្យចាកចេញពីផ្ទះសម្បែង និងការវាយប្រហារលើមន្ទីរពេទ្យនៅហ្គាហ្សា និងលីបង់។ មូលនិធិក៏បានលើកឡើងពីការបិទខ្ទប់ការផ្គត់ផ្គង់ទឹក អគ្គិសនី អាហារ និងប្រេងឥន្ធនៈទៅកាន់តំបន់ហ្គាហ្សា កាលពីខែតុលា ឆ្នាំ២០២៣ ជាភស្តុតាងនៃការចោទប្រកាន់នេះផងដែរ។
មូលនិធិបានអះអាងថា ច្បាប់អាមេរិកអាចផ្តល់មូលដ្ឋានច្បាប់សម្រាប់កាត់ទោសលោក Gallant ទោះបីបទល្មើសដែលត្រូវបានចោទប្រកាន់កើតឡើងនៅក្រៅទឹកដីអាមេរិកក៏ដោយ។ លោកក៏កំពុងប្រឈមនឹងដីកាចាប់ខ្លួនរបស់តុលាការឧក្រិដ្ឋកម្មអន្តរជាតិ (ICC) ចាប់តាំងពីខែវិច្ឆិកា ឆ្នាំ២០២៤ ពាក់ព័ន្ធនឹងការចោទប្រកាន់ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិនៅហ្គាហ្សា។
ជាមួយគ្នានេះ សមាជិកសភាអាមេរិក លោកស្រី Rashida Tlaib បានថ្កោលទោសចំពោះការគ្រោងបង្ហាញខ្លួនរបស់លោក Gallant នៅទីក្រុងញូវយ៉ក ដោយលើកឡើងថា បុគ្គលដែលត្រូវបានចោទប្រកាន់ពីបទឧក្រិដ្ឋកម្មសង្គ្រាម មិនគួរត្រូវបានអនុញ្ញាតឱ្យធ្វើដំណើរបង្ហាញខ្លួនជាសាធារណៈដោយគ្មានការទទួលខុសត្រូវឡើយ។
យោងតាមក្រសួងសុខាភិបាលហ្គាហ្សា ចាប់តាំងពីអ៊ីស្រាអែលចាប់ផ្តើមសង្គ្រាមនៅថ្ងៃទី៨ ខែតុលា ឆ្នាំ២០២៣ មក ប្រជាជនប៉ាឡេស្ទីនជាង ៧៤.០០០ នាក់បានស្លាប់ និងជាង ១៧៦.០០០ នាក់រងរបួស។ ចំណែកចាប់តាំងពីបទឈប់បាញ់ចូលជាធរមាននៅខែតុលា ឆ្នាំ២០២៥ ការវាយប្រហាររបស់អ៊ីស្រាអែលត្រូវបានរាយការណ៍ថា បានសម្លាប់មនុស្សយ៉ាងហោចណាស់ ១.៦៥០ នាក់បន្ថែមទៀត៕

Leave a Reply

Your email address will not be published. Required fields are marked *